Skip to main content

Marluk ataasinngornermi ajunaartut

Politiit sumiiffinni assigiinngitsuni pingasuni, tassa Upernavimmi Aasianni Uummannamilu annaasiniarnermi suliaqarput. Annaasiniarnerni pingasuni ataaseq annaanneqarpoq sinnerilu marluk ajunaarlutik.

Annaasiniaaneq ataaseq ajunngitsumik inerneqarpoq, ataaseq sermip quppaanut nakkarnermini ajunaarpoq ataaserlu umiatsiaaqqami toqungasoq nassaarineqarpoq. Taanna napparsimalerataarnermi toqquteqarpoq paasineqarpoq. 

Upernaviup eqqaani Kullorsuup ungasinngisaani inuk sermip quppaanut nakkarsimasoq politiit ataasinngornermi nalunaaqutaq tallimat missaani nalunaarfigineqarput. Nakkartoq taanna Narsarsuarmiit Qaanaamut sermersuarmi ilisimasassarsiortuuvoq. 

- Qatserisartut innasiortartorlu helikopterimik aallartinneqarput. Unnukkullu qulit missaani apuupput. Innasiortartoq sermip quppaanut ammukarpoq 25 meterinillu ititigisumi tammaaneqartup qamutai nassaaralugit. Innasiortartoq 15 meterisut ititigisumi ammukaqqippoq tammaaneqartoq ujarlugu. Tammaaneqartorlu nassaarineqanngilaq, politiit tusagassiuutinut taama nalunaaruteqarput.

Sermip quppaa ima ititigivoq allaat ujaasinerit suulluunniit iluatsinngittoortussatut nalilerneqarlutik. Politiit taamaalillutik tammaaneqartoq ajunaarsimasutut nalilerpaat ujaasinerlu unitsinneqarluni. 

Nutaamik nalunaartoqarpoq

Arferngup missaani inuk 45-inik ukiulik umiatsiaaqqamini toqungasoq Uummannap imartaani nassaarineqartoq politiit nalunaarfigineqarput. Politiillu erngerlutik sumiiffimmut ornigupput, tassanilu pinerluttoqarsimaneranik takussutissaqanngitsoq nalunaarutigalugu. 

- Pinerluttoqarsimanngitsoq uppernarsineqarpoq timimik misissuisoqareersorlu. 45-inik ukiulik napparsimalerataalernermi toqquteqartoq, politiit allapput. 

Nalunaarut pingajuat

Annaassiniarnerit siuliisa saniatigut Aasiaat eqqaani qeqertap Paarlequtap eqqaani umiatsiaaraq inuttaqanngitsoq nassaarineqarpoq. Issittumi sakkutuut annaasiniaanissamut suliakkerneqarput. Umiarsuarlu alapernaatsoq Lauge Koch aallartinneqarluni. 

- Qulingiluat qaangilaara politiit nalunaarfigineqarput umiatsiami piginnittoq ajornani nunaqarfimminut apississimasoq, politiit tusagassiuutinut nalunaarummi taama paasissutissiipput. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER