Markussen siulersuisuniit tunuartoq
Inga Dora G. Markussen Siumut Nuummi siulittaasunngorami siulersuisuni arlalinni ilaasortaanerminit tunuarpoq. Borgmesterinngorsinnaanini suli oqaaseqarfigerusunngilaa.
Inga Dora G. Markussen sapaatip akunnerata matuma naanerani Nuummi Siumukkormiunut siulittaasunngorpoq, tassungalu atatillugu ilisimatitsissutigaa, siulersuisuni siunnersuisoqatigiinnilu ilaasortaaffigisaminit arlalinnit tunuarniarluni.
Inga Dora G. Markussenimi innuttaasunut kiffartuussivimmi KNR-mi inissiaatileqatigiiffimmilu INI-mi siulersuisunut ilaasortaavoq. Aamma Imigassaq Ikiaroornartullu pillugit Siunnersuisoqatigiinni siulittaasuuvoq.
- Sapinngisannik sukkulluunniit pissarsiarineqarsinaanissara qinersimavara. Inga Dora G. Markussen Sermitsiaq.AG-mut oqarpoq.
Ataatsimeeqatigiinnerni tulliuttuni tunuarniartoq
Taassuma ilanngullugu oqaatigaa, siulersuisut tullissaanik ataatsimiinneranni tunuarniarluni, tassa siulersuisuni ilaasortat allat suleqatigiissimanermut qujaffigerusukkamigit.
Siumut Nuummi siulittaasusutut nutaatut, 2021-mi upernaakkut kommunimut qinersisoqarpat taaguunneqarluarnissaa ilimanarluinnarpoq.
Qinersisoqalerpammi illoqarfiit pingaarnersaata kommuniani, Kommuneqarfik Sermersuumi, partiimi siuttutut borgmesteritut atuuffik pissarsiariniartussaavaa. Atuuffik 2008-mili Inuit Ataqatigiinnit pigineqarsimasoq, borgmesteritut atuuffik taamanikkut kommunerujussuit pilersinneqarmata Asii Chemnitz Narupip borgmesteritut siullertut atuuffigilersimasaa.
Qinigassanngoqatissat suli inissinneqarsimanngitsut
Inga Dora G. Markussenilli Kommuneqarfik Sermersuumi borgmesterinngorsinnaanini suli oqaaseqarfigerusunngilaa:
- Aappaagu kommunimut qinersinissamut qinigassanngortittussat suli inissinneqanngillat. Tamanna ukioq manna kingusinnerusukkut isumaqatigiissutigineqassaaq, sassaqquneqarlungali kaammattorneqarsimavunga, Inga Dora G. Markusssen oqarpoq.
Taassuma erseqqissaatigaa, aappaagu qinersisoqarnissaanut najukkami politikkissap piareersarneqarnissaanut piffissaq qaninnerusoq atorneqassasoq:
- pitsaasumik peqqissaarussamillu piareersassaagut, innuttaasut aamma tusaaneqassapput, Inga Dora G. Markussen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...