Nittaallat tamarmik assigiinngillat. Immikkuullaripput. Aamma uagut inuit taamaappugut.

Aallarnisaasut Maria Motzfeldt aamma Maria Grødem taamatut isumaqarput. Marluullutik timigissarnermi atisanik Flake taaguutigalugu piorsaasimapput, tassalu tuluttut nittaalaq naalisarlugu, septembarip aallaqqaataaniilli Torrak Fashionimi nassaassaasut.

Aviisi Sermitsiaq taama allappoq.

Maria Marialu ukiut arlaqartut sioqqullugit meeqqanut suliniutinik suleqatigeereerput,  aamma taamani sapaatip akunneranut arlaleriarlutik sungiusartarlutik.

Ukiup ataasinngulersup matuma siornagut Flake pilersinneqarpoq angutinut arnanullu atisanik neqerooruteqartoq. Suleqatigiinnerminni Mariap Mariallu maluginiarpaat arlalissuarnik assigiinngissuteqarlutik, aammali namminneq oqarnerattut assigiinngissutsit tunissutaapput.

Assigiinngitsunik piginnaaneqarnerput nukissanik aallerfigaarput, assigiinngissuterpullu peqqutigalugu isumaqarpugut atisaliavut amerlanernut anngutissasut. Mariamit allaanerusunik iluseqarpunga, taamaalillutik atisat uannut tassungalu assigiinngitsumik naammagisarlutigit, Maria Grødem oqarpoq.

Naaperiaaneq

Maria Marialu marluullutik namminersortuupput suliniutit assigiinngitsut suliaralugit, angorusutatullu takorloortarpaat siunissami timigissarnermi atisaliornermik inuussuteqarsinnaanissaq. Aallaqqaammut Flakemik isumassarsipput namminneq pisariaqartitatik aallaavigalugit, atisanik sungiusaatinik naammagilluakkaminnik amigaateqaramik. Saniatigullu maluginiarpaat nunatsini inuppassuit internetikkut timigissarnermut atisanik inniminniisartut.

Isumaqarpugut tamanna uggornartuusoq. Nunatsinni tunisassianik tapersersuinissaq pingaartuuvoq, taamaalillutik aningaasat nunatsinniiginnarlutik, nunaqqativullu tapersersorlugit. Nunatsinni timigissarnermi atisanik allanik peqanngilaq, tamannalu uagut amigaatigaarput, Maria Motzfeldt oqarpoq.

Aviisimi Sermitsiami atuarnerusinnaavutit. Aviisi uani pissarsiariuk:

Sermitsiaq - 15/09-2023

Klik her for at læse