Maqaasineqartut marluk ujaarineqarnerat unitsinneqartoq
Sisamanngormat ualikkut aalisartut marluk maqaasineqartut Ukkusissat/Perliffiup eqqani kangerluup ilorpiaani ujaarineqarnerat unitsinneqarpoq
- Angutit taakku marluk uumatillugit nassaarineqarnissaat naatsorsuutigineqanngimmat, ujaasineq sisamanngormat nal. 14.46 unitsinneqarpoq, taamak oqarpoq Camilla Palmann, Kalaallit Nunaanni Politiit attaveqaqatigiittarfianni sulisoq.
Piffissami pineqartumi qulimiguulik S-61 aalisartunik taakkunannga marlunnik 29-nik aamma 51-inik ukiulinnik ujaasigaluarpoq.
Aalisartut pingajuat marlunngormalli unnukkut nassaarineqarpoq, taanna iluatsinngitsumik uummarsaqqinneqaraluarpoq.
Ajunaarnermut pissutaasoq
Ajunaarnermut pissutaanguatsiarpoq, sermip iigartartup nakkaassimanera, tamatumalu kinguneranik tassaartoqarneratigut umiatsiaaqqat marluk, aalisartut aalisarnerminni atugaat, kinngusimapput.
Camilla Palmannip Sermitsiaq.AG-mut ilisimatitsissutigaa, umiatsiaaqqaat nassaarineqarsimasut, sikumillu ajoquserneqarsimagaluartut pingasunngormat kalillugit nunaqarfimmukaanneqarsimasut.
Ajunaartoqarnerani ikiuigasuartartut Avannaatalu Kommuniani borgmesteri Palle Jeremiassen ullumikkut nunaqarfiliassapput. Ikiuigasuartartut ilaqutariit ajunaarnermit eqqugaasut ikiussavaat, borgmesteri KNR-imut ilisimatitsivoq.