Maniitsup eqqaani erngup nukinganik nukissiorfiliortoqassappat nukik annikinnerussaaq
Maniitsup eqqaani Kangerluarsuup nunataani, erngup nukinganik nukissiorfiliortoqassappat, Aasiaat Qasigiannguillu eqqaanni erngup nukinganit periarfissaasutulli Maniitsup eqqaani nukissiorfik pilersuisinnaanngilaq.
Siverth K. Heilmanni Atassummeersoq isumaqarpoq, Aasiaat Qasigiannguillu eqqaanni erngup nukinganik nukissiorfiliornissamut inuiaqatigiit annertoorujussuarnik aningaasartuuteqalersitsinnagit, allami erngup nukinganik nukissiorfiliorsinnaanerup misissorneqarnissaa pingaaruteqartoq.
Paragraf 37 naapertorlugu apeqqutinut akissutini atuarneqarsinnaavoq, Maniitsup eqqaani illoqarfimmut qanittumi erngup nukinganit periarfissaqarfiit, kisimiitillugit imaluunniit ataqatigiissillugit atorluarneqarsinnaasut marluusut 490 aamma 620 millioner koruunit akornanni akeqassasut, periarfissaqarfimmut allermut allat, tamarmik immikkut 20 GWh/ukiumut nalilerneqarsimasut ataqatigiissinneqarpata, 50 GWh/ukiumut tunisassiorsinnaasutut nalilerneqarsimapput.
Aasiaat Qasigiannguillu eqqaanni erngup nukinganik nukissiorfiup pilersuisinnaanerata affaata missaanik annikinnerusumik pilersuisinnaassaaq. Maniitsumulli tunngatillugu kisitsisit taaneqartut apeqquserneqassapput, ”periarfissaqarfiit eqqortumik takutinnissaannut imermi uuttortaanerit annertunerusut pisariaqartinneqarmata”, akissuteqaammi ilisimatitsissutigineqarpoq.
94 GWh/ukiumut pilersuisinnaasutut nalilerneqartoq
- Qasigiannguit aamma Aasiaat pilersorneqarnissaannut Kuussuup Tasiani erngup nukinganit periarfissaqarfiit maannakkut atugassiinissamut siunnersuummi 15-21 MW-inik pisinnaasaqartussatut pilersaarusiorneqarpoq. Periarfissaqarfiusoq Kuussuup Tasia 94 GWh/ukiumut pilersuisinnaasutut nalilerneqarpoq.
Maniitsup eqqaani erngup nukinganik nukissiorfiliorsinnaanermut atatillugu Nukissiuuteqarnermut Naalakkersuisup Kalistat Lundip ilisimatitsissutigaa, Qasigiannguani aamma Aasianni pilersuinissamut erngup nukinganut suliassatuulli killiffeqalernissaanut naatsorsuinerit ukiut marluk arfinillillu akornanni sivisussuseqassasut.
- Nukissiorfiit eqqumaffigeqquaa, najoqqutassat pigineqartut neqeroortitsinissamut tunngavigineqarsinnaanngitsut, aamma annertunerusunik misissueqqaarnernik il.il. suliaqartoqartussaasoq, Kalistat Lund akissuteqaammi juunip aappaani suliarineqarsimasumi, Inatsisartulli nittartagaatigut juulip 26-ani aatsaat saqqummiunneqartumi ilisimatitsivoq.