Maniitsumi umimmanniarneq augustip aallaqqaataani aallartiinnassaaq
Maniitsup eqqaani umimmanniarneq augustip aallaqqaataani aallartittussatut Naalakkersuisunit inissinneqarpoq. Umimmanniarnerup kingusinnerusukkut aallartinnissaanut pilersaarutit tusarniutigineqartut isornartorsiorneqangaatsiarmata, atortinniarneqarunnaarput.
Maniitsup eqqaani umimmanniartussat augustip aallaqqaataaniit piniariarnissamut piareersalereersinnaapput.
Piniariarfissatummi piffissaliussaq siornatigut atorneqareersoq ukioq manna atuutiinnassaaq.
Aalisarnermut, piniarnermut nunalerinermullu naalakkersuisoqarfik tusagassiorfinnut nalunaaruteqarlutik taama ilisimatitsipput.
Aalisarnermut, piniarnermut nunalerinermullu naalakkersuisoqarfiup, biologit innersuussutaat malillugu, sumiiffimmi umimmanniarneq augustip 15-ani aallartittussatut pilersaarutigigaluarpaat.
Siunnersuulli junimi tusarniutigineqarmat isornartorsiorneqangaatsiarpoq. Siumut inuusuttaasa ilaatigut oqaatigaat pilersaarutit ingerlatiinnarneqassappata, meeqqat atuarfianni atuartut piniariaqataanissamut periarfissaqarunnaassasut, atuarneq augustip qiteqqunnerani aallartittussaammat.
- Ilaqutariit ataatsimut feriassatik inississorajuppaat pingaartumik qitornaqarsimagaangamik qitornaasa atuanngiffeqarneranni qangatut aavartartut ulluliigajupput, Siumut inuusuttai tusagassiorfinnut nalunaaruteqarluni juunip qiteqqunnerani allapput.
Inuussutissarsiutigalugu piniartut sunngiffimmilu piniartut augustip aallaqqataaniit oktoberip 15-at ilanngullugu umimmanniarsinnaapput.