Maniitsumi radioqalernissaa aallartisarneqarpoq

Peqatigiiffik Maniitsumi Radiu arfininngormat pilersinneqarpoq, Nuka Ole Berthelsen siulittaasutut toqqarneqarluni.

Peqatigiiffiup anguniagarivai Maniitsup illoqarfiani uummaarissumik lokalradioqalernissaa, peqatigiiffiup siulittaasuata tulliata Paalu Møllerip Sermitsiaq.AG-mut oqaatigaat. Innuttaasut nipaasa tusaaneqarnerulernissaat aamma anguniarneqartoq ilisimatitsissutigaa.

- Maniitsumi lokalradioqartoqartariaqarpoq, assersuutigalugu Maniitsumi akerliussutsimik takutitsisoqarmat KNR-imut saaffiginnissimagaluarpugut itigartinneqarluta assingusumik Nuummi akerliussutsimik takutitsisoqarnera pissutigalugu. Illoqarfitsinni radioqartariaqarpoq oqalliffiusinnaasumik, Paalu Møller oqarpoq.

Peqatigiiffilerinerup tungaatigut aamma uumarsaaqataassasoq oqaatigaa.

- Uummaarissumik peqatigiiffilerisoqartarnikuunera uterfigineqarnissaa kissaataavoq. Illoqarfitsinni aamma paasissutissiisarfimmik amigaateqartoqarpoq, tassuuna sukkasuumik nutaarsiassiisoqarsinnaasarnera amigaataasarluni. Radioqalernissaa maanna sulissutigileruttorparput, aappaagu aallakaatitsisalersinnaanerput neriuutigaarput, Paalu Møller oqarpoq.

Siulersuisut imatut inissinneqarput:

Siulittaasoq: Nuka Ole Berthelsen

Siulittaasup tullia: Paalu Møller

Allatsi: Sidse Berthelsen

Siulersuisuni ilaasortaq: Bolethe Skifte

Siulersuisuni ilaasortaq: Inger Larsen