Maniitsumi Nipilersornermik ilinniarfik Tivolimi aaqqissuussamut peqataaniartoq
Maniitsumi Nipilersornermik ilinniarfik ukioq manna Tivolimi nipilersornermik ilinniarfiit ulloqartinneqarnerinut peqataassaaq, tassani agiartartut Danmarkimi nipilersortartut naapittarfianni annerpaami peqataassapput.
Ukioq kingulleq Tivolip Nipilersornermik ilinniarfiit ulloqartinnissaannut atatillugu tusagassiuutinut nalunaaruteqarnermini agiartartut Maniitsumi Nipilersornermik Ilinniarfimminngaanneersut peqataanissaat kukkuluttornikkut eqqaavaat.
Angalanissamulli aningaasartuutissat naammassineqarsimanngimmata paatsuuisoqarsimavoq.
Ukioq mannalu Maniitsumi Nipilersornermik Ilinniarfik Tivolimi Nipilersornermik ilinniarfiit ulloqartinneqarnerat peqataaffigissavaa.
Maniitsumi Nipilersornermik Ilinniarfimmi aqutsisoq Ida Mortensen taama oqaluttuarpoq.
- Ilinniartuutigineqartut angusaqarusussuseqartuupput,
Nuummilu agiarnermik unamminernut arlalinnut peqataatitaqareerluni kiisalu Uummannami meeqqat
peqatigalugit tusarnaartitsinikuullutik, Ida Mortensen oqaluttuarpoq.
Pilersaarummi tusarnaartitsissutissat assigiinngitsut
pilersaarutaapput, ilaatigut pattagiarluni tullinnguuttutigut tusarnaartitsinerit, Sophus Elmark immikkoortillugu Hayden-imit, Mozart-imit Eine Kleine Nachtmusik aallarniutaasoq kiisalu Innarta
Anaanaga.
- Tusarnaartitsissutissat sungiusarluarnissaat angumeriniarlugu, nipilersornermik ilinniarfimmi ilinniartut maannakkut sapaatip akunneranut pingasoriarlutik kiisalu angerlarsimaffimminni
sungiusartarput. Tusarnaartitsinerit aallartinnginnerini ullut kingulliit Danmarkimiissaagut, tassaniluttaaq sungiusarluni camp-eqartitsilluta, taamaalilluni nipilersuutit immineq pilersinneqanngitsutut
oqaatigineqarsinnaalluni, Ida Mortensen, Tivolimi Nipilersornermik ilinniarfiit ullorititaanni immikkoorluni tusarnaartitsilluni kiisalu nipilersortuni aqutsisutut siornatigut peqataasimasoq, oqarpoq..
Nipilersornermik ilinniarfinnut Tivoli-mi ulloqartitsisarneq 29-ssaanik ingerlanneqalerpoq, nipilersornermillu naapiffik maajip tallimaaniit arfernata tungaanut Danmarkimi, Spaniami Kalaallit Nunaannilu nipilersornermik ilinniarfiit assigiinngitsut 72-it meeqqanit inuussuttuniillu 6000-it sinnerlugit peqataaffigineqarluni ingerlanneqassaaq.
Misilittakkat naapertorlugit Nipilersornermik ilinniarfinnut ulloqartitsisarneq naalagaaffimmit avataaniillu 50.000-inik amerlatigisunit tusarnaarneqartarput.