Maniitsumi katersugaasiviup Gitz-Johansen nalliuttorsiutigaa
Aage Gitz-Johansen, nunatsinnit assilisanik eqqumiitsuliortuusimasup, inuuianiit ukiut 125-inngornerannut atatillugu Maniitsumi katersugaasiviup eqqumiitsuliortup suliai saqqummersippai.
Maniitsumi katersugaasiviup eqqumiitsuliortup Aage Gitz-Johansenip inuuianit ukiut 125-t qaangiunnerannut atatillugu eqqumiitsuliai 30-t 2. augustimiit 29. september ilanngullugu saqqummersippai. Eqqumiitsuliortoq 20. august 1897-imi inunngorpoq.
Aage Gitz-Johansen eqqumiitsuliortuuvoq qallunaat, nunatsinnit isumassarsiorluni qalipaasarsimasoq.
Saqqummersinneqartut erneranit, Jeppe Gitz-Johansenimit atorneqarput.
- Saqqummersitsinermut atatillugu Jeppe Gitz-Johansen Bornholmimiit Maniitsumukassaaq, 20. august, ataatami inuuiani saqqummersitsisoqarnerani peqataajartorluni, Maniitsumi katersugaasivik tusagassiorfinnut nalunaaruteqarluni allappoq.
Ernera kingullermik Maniitsumiippoq ukiut sisamat matuma siorna. Maniitsumiinnermini katersugaasiviup eqqaani innaq qiperorpaa, arferit assilillugit qiperuilluni.
Nuliani Maniitsumi naapikkaa
Aage Gitz-Johansenip nuliani, Vibeke, Maniitsumi 1932-imi naapippaa.
Eqqumiitsuliortoq, Qalipaasorsuarmik taagorneqartoq issittumi ilisimasassarsiortumit Knud Rasmussenimit nunatsinnut tikeraarsarneqarsimavoq.
- Gitz-Johansenip nunarput inuilu asannilerfigisimavai. Qalipaasorsuarmit saqqummersitsineq siulleq Nunatta Katersugaasiviani 1984-imi ingerlanneqarpoq, Maniitsumi katersugaasivik allappoq.
Gitz-Johansen ukiut 45-t matuma siorna toquvoq.