Maniitsumi iluatsilluartumut aningaasaliineq annertooq

Namminersorlutik Oqartussat suliffeqarfiutaat aningaasaliinermik suliaqartoq, Greenland Venture, nerisassiorfimmut Lilleholm Foodimut Maniitsumiittumut aningaasaliivoq, taamaalillutik suliffeqarfiup 40 procentianik piginnittunngorlutik.

Tunisassiorneq nutaalianngorsarlugu
Aningaasaliinerup Lilleholm Food amerlanerusunik kalaallit nioqqutissiaataannik suliarinnissinnaanissaat qulakkiissavaat, tunisassiorneq annertusillugu aamma nutaalianngortillugu kiisalu nutaanik nioqqutissaateqalersillugu.

Tupigusuttoq
Greenland Venturemi investmentmangeri Per Buhl Olsen, Lilleholm Foodip ineriartornera tupigaa.

- Suliffeqarfiup aallarnisarneqartup sulisut 25-t atorlugit ukiut pingasut ingerlanerinnaani suliffeqarfinngortinnissaa peqqissoq ajornarkusoorpoq, kisianni tamanna Lilleholmip sapinngilaa. Niuernerat ingerlalluarpoq illoqarfinni nunaqarfinnilu pingasuni sulisussaqartitsipput. Aningaasaliissutigut Lilleholmip tunisassiorneranut ataqatigiissarineraneranullu sunniuteqarluassapput – tamannalu nuna tamakkerlugu atuisunut iluaqutaassaaq, tusagassiorfinnut nalunaarummi taanna erseqqissaavoq.

Suleqat pingaarutilik
Tamanna Lilleholm Foodimut aningaasaliineq pingaartuuvoq.

- Atuisut maannamut soqutiginninneq tatiginninnerlu takutitaat nuannaarutigeqaarput. Taamaattumik Greenland Venture peqatigalugu alloriaqqilerpugut. Aningaasaliissutaat annertusarnissatsinnut atussavagut – kisianni aamma ilisimasat piginnaasallu nutaat siulersuisutsinnut eqqutissapput, tamannalu aamma uatsinnut pingaaruteqarpoq – suleqateqarnissarput ineriartornitsinnilu ’arsaqateqarnissarput’ pingaartikkatsigu, Lille Holmimi pisortaq Jens Møller erseqqissaavoq.

Aalajaatsoq
- Tunisassiassat nunatsinni piumaneqartut tunisassiarissallugit siunertaraarput. Anginerpaat akornaniilernissarput siunertarinngilarput, kisianni tunisassianik pitsaasunik sanasassaagut suliffeqarfiullutalu aalajaatsoq, taanna ilanngullugu oqarpoq.

Aamma sulisunut politikkimi oqaatigineqarpoq, Lilleholm Foodimi sivikitsumik atorfeqartarnissaq pinngitsoorniassagaa.

Tunisassiorneq annertusineqassaaq
Lilleholm Food Maniitsumi pingaarnertut allaffeqarfeqarpoq, tassani ullumikkut sulisut 16-17-it ulloq naallugu puisinik, arfernik, umimmannik aalisakkanillu assigiinngitsunik piareersaasarput.

Napasumi Maniitsup kujataaniittumi inuit 6-8 aalisakkanik tarajortikkanik saarullinnillu issimut panertitanik suliaqarput. Januarimi Lillehold Kangerlussuarmi toqoraavimmi tunisassiulissaaq.

Avammut tunisassiorneq
Lilleholmimi nerisassat ilisimaneqartut tunisassiallu nutaat siornatigut takuneqarsimanngitsut suliarineqartarput: Kalaallit snackii, ilaqutariinnut igaassat ullunut tallimanut naammattut, umimmaap najungasui nalliuttorisiornermi atorneqarsinnaasut umimmaallu neqaanut pizzaliat ulluinnarsiu – allarpassuillu.

Lilleholm maannakkut aalisakkanik tarajortikkanik Portugalimut tunisassiorpoq alloriarnerlu tulleq tassaassaaq eqalunnik Belgiamut Tysklandimullu nioqquteqarneq.

Eqqussuineq millisarniarlugu
Greenland Venturep suliffeqarfinnut Kalaallit Nunaanni ineriartortitsisinnaasunut suliffinnillu pilersitsisinnaasunut aningaasaliisarpoq. Greenland Venturep aningaasaliissutit avataanit nioqqutissanik eqqussuinermik pinngitsuuisinnaajunnaarsimanermik annikillisaasussat immikkut ittumik qitiutippai.

Nerisassat Pinngortitameersut' aggustip qaammataani sammisatut qulequtarineqartoq takuiuk? Taamaanngippat maani takusinnaavatit