Annaassiniarnerit
Maniitsoq: Sapaatip akunnerata naanerani annaassiniarnerit marluk
Maniitsumi politiit tallimanngornermi sapaammilu imaani annaassiniarnerit marluk imminnut attuumassuteqanngitsut ingerlassimavaat. Ujarneqartut tamarmik ajunngitsut nassaarineqarput
Imaani angalasunik annaassiniarnerit imminnut attuumassuteqanngitsut marluk Maniitsumi politiinit tallimanngornermi sapaammilu ingerlanneqarsimapput. Ujaasinerni tamani ujarneqartut katillugit sisamat, umiatsiaaqqani ammaannartuni angalasut, ajunngitsut qiiasulli nassaarineqarsimapput.
Taama Qeqqani Politiivini politikommissæri, Johan Davidsen, Sermitsiaq.AG-mut oqaluttuarpoq.
VHF-imik aamma GPS-imik atortoqaratik unittoortut
Annaassiniarnermi siullermi politiit Sisak II peqatigalugu tallimanngornerup unnukkuani arfiningornerullu unnuaani ingerlataanni, ujarneqartunut ilaqutaasut isumaalullutik politiinut kalerriuteqareersullu, ujaasineq aallartinneqarpoq. Ujarneqartut marluk umiatsiaaqqamik Nuummitsimik ammaannartumik angallateqarlutik Napasumiit Maniitsuliarlutik tallimanngornermi ualikkut aallarsimapput, kisiannili VHF-imik imaluunniit GPS-imik nassataqarsimanatik.
Qeqqani Politiivini politikommissæri Johan Davidsen Sermitsiaq.AG-mut oqaluttuarpoq Sisak II-p ujarneqartut taakkua marluk arfininngornerup unnuaani Maniitsup Napallu akornanni saavittut nassaarisimagai.
- Ujarneqartut taakkua marluk politiit angallataannit Maniitsup Napasullu akornanni saavittut nanineqarput. Ajunngillat, kisianni nillernerani qiiapput, Johan Davidsen oqaluttuarpoq.
Silarluup ataani orsueruttut
Annaassiniarnerup aappaa sapaammi ingerlanneqartoq politiinut oqinneruvoq, umiatsiaq Poca 600 marlunnik issimasoqartoq GPS-eqarlunilu VHF-radioqarmat.
Johan Davidsenip oqaluttuarnera naapertorlugu nassaarineqartut taakkua marluk Maniitsumiit Kangaamiuliarlutik aallaraluarsimapput, kisiannili silap ajorpallaarnera pissutigalugu Maniitsumut uterlutik aqqutaani orsuerussimapput.
- Taakkua nanineqartut marluk sumiiffitsik eqqortumik nalunaarutigaat, Maniitsumiillu avammut akunnerup affaa ingerlareernermi nanineqarlutik, Johan Davidsen oqaluttuarpoq.