Skip to main content

Mamianartuliaq KNI-mi qullersanut Deloittemullu artorsaatissiivoq

KNI-mi peqqumaasivimmiittuutit nalinginik allanngortiterisarnermik pasilliuteqarnerit aqutsisuinnarnut artorsaatissiinngillat, ingerlatseqatigiiffiup kukkunersiuisuinut Deloittemut artorsaatissiipput, Copenhagen Business Schoolimi lektori, Troels Michael Lilja, ingerlatseqatigiiffiit pillugit inatsisinik immikkut ilisimasalik aamma kukkunersiuisartoqarfinni sulisimasoq taama oqarpoq.

KNI A/S-imi naatsorsuutinik allanngortiterisarnerit pillugit pasilliutit ilungersunartut, ilumoorunik, aqutsisunut aamma kukkunersiuisarfimmut ukiumut naatsorsuutit pillugit inatsimmik kukkunersiuisullu inatsisaannik unioqqutitsinermi akiligassitsinnermik kinguneqarsinnaapput. Pillaasarnermut inatsit unioqqutinneqarsimanersoq nalunarpoq, kisianni tamanna itigartitsissutigineqarsinnaanngilaq, lektor Troels Michael Lilja, CBS LAW, taama naliliivoq.

Naatsorsuutitigut peqquserluuteqartoqarneranik pasilliutinut tusarfik kinaassutsiminik isertuussisoq, Hans Peter Lynge-Larsen, tallimanngormat aviisimi Sermitsiami sassarpoq, tassanilu 2014-imiilli IT -mut programmi immikkut ilusilersugaq atorlugu nioqqutissaat amerlassusaat aamma nioqqutissat akerpiaasa allanngortitertarsimanerlugit nassuiaqqissaarpaa, tamatumalu kinguneranik suliffeqarfissuarmi KNI A/S-imi Namminersorlutik Oqartussanit pigineqartumi peqqumaasiviit nalingi qaffatsinneqartarlutik.  

Aaqqissuussaq piviusorsiortoq
- Nassuiaanerup ilumoortuunera tunngavigissagukku, kisianni soorunami tamanna maanna aalajangiiffigisinnaanngilara, ingerlatseqatigiiffiup kukkunersiuisuata peqquserlunneq paasisimanngippagu tupigilluinnarpara, lektori Troels Michael Lilja, CBC LAW-meersoq oqarpoq.

Ingerlatseqatigiiffiit peqqumaasivimmiittuutit nioqqutissat nalinginut naatsorsuinermut tunngaviusunik immikkut IT-mut programmiliortarnerat nalinginnaasuusoq taassuma nassuarpaa.

- Kisianni kukkunersiuisup systemip qanoq ataqatigiissarneqarsimanera misissortarnissaa periuseq nalinginnaasuuvoq, taamaalilluni kisitsisit inerneri assigiinngitsut eqqortuuneri qulakkeerneqartassammata. Naatsorsuutit inernerat systemini immikkut ittuni kisitsisinut nalingi assigiisilernerisigut tamanna qulakkeerneqartarpoq. Kukkunersiuisummi suliaannut tamanna tunngaviuvoq, lektori naqissusiivoq, taassuma Hans Peter Lynge-Larsenip aviisimi Sermitsiami saqqummertumi kingullermi aaqqissuussaq taanna ”piviusorsiorpalaartutut” isigaa.

Kina akisussaasuua?
Siulersuisunut siulittaasup Lars Borris Pedersenip siornatigut ilisimatitsissutiginikuuaa, pasilliutit ingerlatseqatigiiffiup kukkunersiuisuanut Deloittemut misissortinneqartut, naatsorsuutitigullu kukkuluttortoqarnera 2010-minngaanneersoq paasineqartoq, taamanikkut aningaasaqarnikkut nutaamik systemimut nuuttoqarpoq. Tamannalu nammineerluni aningaasaatit 50 millionit koruuninik appartinneqartariaqarnerinik kinguneqarpoq.

Naatsorsuutitigut kukkunerup 2010-meersup ukiuni tulleriinni peqqumaasivimmiittuutit nalingisa qaffatsinneqarnera toqqortorniarlugu, maanna nammineq aningaasaatit appartinneqarnerinik kinguneqartup, peqquserluutigineqartarsimanerinik isumaqarnersoq apeqquterujussuuvoq.

- Maanna aqutsisut uanga isinnik akisussaasuunnginnerarsinnaanngillat, peqqumaasivimmiittuutit nalingi pillugit kukkuneq 2010-meersuugaluarpalluunniit, allanillu aqutsisoqarallarnerani pisimagaluarpat. Maanna aqutsisut naatsorsuutitigut peqquserluttuliorsimappata, uanga isumanni suliaq ilungersunartorujussuuvoq, Troels Michael Lilja oqarpoq.

- Naatsorsuutit eqqortuunissaat aqutsisutut akisussaaffigineqarput. Tassami qullersatut akisussaasutut suliffeqarfiup iluani nakkutilliinerit ajunnginnissaat qulakkeerneqartussaapput, ukiumoortumillu naatsorsuinermut inatsimmut aalajangersakkanut tunngatillugu kukkunersiuisut aqutsisullu akiligassinneqaratarsinnaapput, CBS LAW-imi lektori ilisimatitsivoq.

Immaqa peqquserluttoqartoq
- Sakkortunerusumik pillaatissiinermik kinguneqarsinnaasumik pillaasarnermut inatsimmi unioqqutitsisoqarsimanersoq, maanna ilisimatitsissutigineqartunit aalajangerneqarsinnaanngilaq. Paarititanik peqquserlunnikkut ajunaaruteqartitsisoqanngilaq, kisianni peqquserluttuliortoqaratarsimasinnaavoq, Troels Michael Lilja oqarpoq.

Naatsorsuutitigut peqquserluttuliortoqarsimaneranik pasilliutit misissorneqartut, politiit Sermitsiamut ilisimatitsinikuupput, suliarlu peqquserluttuliortoqarneranik qulequtaqarpoq, politiinut nalunaarummi apriilimi tunniunneqartumi tamanna atuarneqarsinnaavoq.

Peqqumaasivimmiittuutit nalingi suliffeqarfimmut KNI-tut ittumut qitiulluinnartuusut, CBS-imi lektori nassuiaavoq, niueqatigiinni peqqumaasiviit pigisat nalillit annertunerpaat ilaanniittarneri pissutaalluni, KNI A/S-imilu peqqumaasiviit pigisat nalillit affaasa missingaat.

Aqutsisut naatsorsuutinik pitsaanerusumik isikkoqartitsiniarnermut kajuminnerannut peqqutaasinnaasut annertuut marluk taakkartorpai.

Pissutaasinnaasoq
- Peqqumaasivimmiittuutit nalingisa qaffasitsittuusaarneqarnerisugut ingerlatseqatigiiffik patajaannerusutut saqqummissaaq, taamaalillunilu ajorpallaanngitsumik atugaqarluni taarsigassarsisinnaalluni. Aammattaaq aqutsisut tunngaviusumik akissarsiat saniatigut tapinik pissarsisinnaagunik naatsorsuutinik kusassaarusussuseqarsinnaapput, lektori nassuiaavoq.

KNI A/S-ip pisortaanera kisartaalluni pisortaaneqarfimmiittoq, Peter Grønvold Samuelsen, ukiumut aningaasarsiami saniatigut immikkut ittumik tapisiaqarsinnaalluni isumaqatigiissuteqarpoq. Ukiumi naatsorsuiffiusumi kingullermi pisortaaneq aalajangersimasumik akissarsiami (soraarnerussutisiat ilanngullugit, aaqq.) 3.468.000 koruunit saniatigut 307.000 koruuninik tapisisimavoq.

Siulersuisunut siulittaasup Lars Borris Pedersenip taamaakkaluartoq nassuiarpaa, naatsorsuutitigut angusat kisimik tapisinermut pissutaaneq ajortut, allat aamma aalajangiisuusartut, ”aqutsisut taamaalillutik naatsorsuutitigut angusanik isumaliuteqarluni tapinik pissarsisassanngimmat”, Lars Borris Pedersen ilisimatitsivoq.

Læs hele sagen:

  1. KNI har rod i regnskaberne
  2. KNI fejer regnskabsfusk ind under gulvtæppet
  3. Pustes et lager op påvirker det overskuddet
  4. Uvildig undersøgelse af KNI-sag
  5. Tilliden skal genoprettes
  6. Tatiginninneq pilerseqqinneqassaaq
  7. Sådan blev KNI-regnskab manipuleret
  8. KNI-bestyrelse vil afvente politiets efterforskning
  9. KNI-mi siulersuisut politiit paasiniaanerat utaqqeqqaarniarpaat
  10. KNI ramt af corona-restriktioner
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER