Maliup Sara nersorpaa Simon isornartorsiorlugu
Kangerlussuup siunissaata aalajangerneqarnissaa Naalakersuisunit utaqqimaarneqarniartoq isornartorsiorneqarpoq
Qeqqata Kommuniani borgmesteri Malik Berthelsen parteeqatini Simon Simonsen, angallannermut naalakkersuisuusoq, isornartorsiorpaa, saniatigut Inuit Ataqatigiit nersualaarlugit.
Inuit Ataqatigiit mittarfiit pillugit saqqummiussaat nersualaarpaa, tasssami Kangerlussuup attatiinnarneqarnissaanik oqariartuuteqartoqarpoq.
- Tassami mittarfissuit pilersinniarneqarput takornariaqarnerup annertusarnissaa kissaatigineqarmat. Taamaattumik imminut assortuunneruvoq takornariaqarnikkut mittarfik ingerlalluartoq sulilu annertusarneqarnissaminut periarfissagissaartoq atorumaneqanngippat, tusagassiutinut nalunaarummi Malik Berthelsen oqarpoq.
Kangerlussuarmi takornariaqarnermik suliaqarneq pitsaanerusumik sulissutigineqartariaqartoq isumaqarpoq.
- Kangerlussuaq amerlasuunit asuli akunnittarfiinnartut isigineqaraluartoq, tassaavoq misigisassarsiorlutik takornarianit soqutigineqarluartoq aammalu timmisartorsuup tamatigut missinnaaneratigut, nunatsinnut umiarsuarnik takornariartaatinut pingaarutilimmik inissisimasoq. Sulilu isumalluarfigineruvarput Aasivissuit-Nipisat, UNESCO-ip allattorsimaffiannut ilanngunneqarnerani suli annertunerusumik orniagarneqarnerulernissaa, Qeqqata Kommuniani borgmesteri oqarpoq, nangillunilu:
- Taamaattumik IA nersualaarusuppara Kangerlussuup nunatta pisariaqartikkaa takusinnaammassuk, upperalugulu ineriartorteqqinneqarnissaa periarfissagissaartoq.
- Angallannermut Naalakkersuisup taamatut oqariartuuteqarnera soorunami pakatsissutigivara, aammalu Qeqqani inuussutissarsiornikkut ineriartoqataarusunnerput allanit soqutaannginnerusutut naliliinertut paasillugu.
- Tassami augustimi Simon Simonsenilu ataatsimiinnitsinni, Kangerlussuup siunissaa pillugu suleqatigiissitamik pilersitsinissatsinnik isumaqatigiissuterput sumut atussavarput, suleqatigiissitap suliaa Naalakkersuisut atorfissaqartinngippassuk?, Malik Berthelsen oqarpoq.