Malittarisassat nutaat: Umiarsuit takornariartaatit ukioq manna tikissinnaajunaarput
Kalaallit Nunaannut isernissamut malittarisassat nutaat malitsigisaannik, umiarsuit takornariartaatit kingulliit Kalaallit Nuaannukarnissaminnut suli taamaatitsiinnarsimanngitsut qularnanngitsumik unitsitsiinnarnerannik kinguneqassapput, Visit Greenland naliliivoq.
Nunami takornariaqarnermut siunnersuisoqatigiit Visit Greenlandip uggoraa, umiarsuarnik takornariartaatit isernissamut malittarisassanit nutaanit immikkut sakkortuumik eqqugaanerat.
Kalaallit Nunaanni nunap ammaqqinneqarnerani immikkoortup aappaa marlunngormat atuutsinneqarlerpoq, malittarisassallu nutaat naapertorlugit, umiarsuaq takornariartaat, Kalaallit Nunaannut tikitsinnani ullut 14-it sioqqullugit nunat allat umiarsualiviini talinngasimassanngilaq.
Savalimmiuni Islandimilu umiarsualiviit tassunga atatillugu nunat allat umiarsualiviinut ilaapput, Namminersorlutik Oqartussat malittarisassani nutaani erseqqissaapput.
Umiarsuarnik takornariartitsisoqarsinnaanngitsoq
Malittarisassat malillugit umiarsuarnik takornariartitsinissaq unitsivinneqartariaqassaaq, Visit Greenland naliliivoq:
- Malittarisassat nutaat taakku malillugit, Kalaallit Nunaanni umiarsuarnik takornariartitsisoqarsinnaaanngilaq, umiarsuarnermi takornariartaatiutillit ilaasullunniit ornitaminni misigisassarsiorniarlutik takornariatullu misigisassaminnik pisiaqarniarlutik, nunamukarsinnaanatik ulluni 14-ini avataaniiginnarnissartik pileriginavianngilaat, Visit Greenlandimi pisortaq Julia Pars Sermitsiaq.AG-mut oqarpoq.
AAMMA ATUARUK: Ammaaqqinneq: VG-mit neriuutigineqarpoq Danmarkimit takornariaqassasoq
- Umiarsuit takornariartaatit 2020-mi Kalaallit Nunaannukarnissaminnik pilersaaruteqartut sinneri eqqarsaatigalugit, Visit Greenlandimit maanna naatsorsuutigineqarpoq, pilersaarutit tamarmik umiarsuarnik takornariartaatileqatigiiffinnit taamaaatiinnarneqassasut, Julia Pars nangilluni oqarpoqe.
Visit Greenlandimi kitsisitigut paasissutissat malillugit, Kalaallit Nunaat 2019-imi umiarsuarnut ilaallutik takornariartunit 46.633-nit tikeraarneqarsimavoq. Sapaatip akunnerisa malussuit matuma siorna aviisi AG allappoq, umiarsuit takornariartaatit assigiinngitsut 256-it tikinnissaat taamaatiinnarneqarsimasut, 145-lli suli tikissinnaasut.
Nunat allat tikittoqartarnissaanut akuersisimasut
Pisortap Julia Parsip uggoraa, malittarisassat ilaasa, timmisartukkut ilaasunut attuumassuteqartut, umiarsuarnut ilaallutik takornarianut atuutsinneqannginnerat.
Taassuma oqaatigaa, umiarsuanik takornariartitsinissat ilai ikittunnguit annaanneqarsimasinnaagaluartut, assersuutigalugu ilaasut tamarmik COVID-19-imut misissortissimanissaannik, umiarsuarnut ilaallutik takornariat nunanit isernissamut akuerisaasimasuneersuunissaannik, aamma umiarsuit taamaallaat Kalaallit Nunaanni nunaqarfinnut illoqarfinnullu aalajangersimasunut tikissinnaanerannik piumasaqaateqarnikkut.
Julia Parsip aamma innersuussutigaa, nunat avannarlerneersut ilaasa umiarsuit takornariartaatit malittarisassaqartillugit tikissinnaanerat akuersaarsimagaat:
- Taakkununnga ilaavoq Svalbard, tassani inuussutissarsiortut oqartussallu malittarisassat pillugit oqaloqatigeeqqaarsimapput, aamma peqqissutsimut isumannaallisaanermullu tunngassuteqartut ajorseriartinngikkaluarlugit umiarsuarnik takornariartitsisoqarsinnaaneranut tunngatillugu, Julia Pars oqarpoq.