Malittarisassat nutaat: Moms eqqumaffigineqarli
Danmarkip EU-llu nioqqutissat EU-mi nunanut eqqunneqartut 2021-mi juulip aallaqqaataa aallarnerfigalugu nutaanik akitsuusersimavaat. Tamanna Kalaallit Nunaanni sullitat ilaannut sunniuteqassasoq, Tusass-imit ilisimatitsissutigineqarpoq.
Kalaallit Nunaanni suliffeqarfittut poortukkamik Danmarkimi inuinnarmut nassiussiniaruit, momsip, akitsuutip eqqussinermilu akiliutigineqartartut iluini nutaanik malittarisassaqalersimanera eqqumaffigisariaqarpat.
Tamannattaaq Kalaallit Nunaanni inuinnaat Danmarkimi suliffeqarfimmut nassiussinerannut atuuppoq.
Danmarkimmi EU-llu nioqqutissat EU-mi nunanut eqqunneqartut nutaanik akitsuusersimavaat. Akitsuut 2021-mi juulip aallaqqaataani atuutsinneqalersoq nunanit EU-mut ilaasortaanngitsunit, aamma Kalaallit Nunaannit nioqqutissanut nassiunneqartunut tamanut atuuppoq.
- EU-p nutaanik akitsuusiinermini ilisimatitsissutigisimavaa, EU-mi suliffeqarfiit allatsitsisartut assersuutigalugu kangia ungallermi suliffeqarfinnut allatsitsisarnermik ingerlataqartunut unammillersinnaanerunissaat anguniagaasoq, Tusasss (Tele-Postiusimasoq) ilisimatitsivoq.
Moms eqqussinermilu akiligassaq
Inuit nassiussiffigineqartut taamaammat malittarisassanik nutaanik eqqumaffiginnittariaqartut, Tusass ilisimatitsivoq.
- Allannguuteqarneq pingaarnertut nioqqutissanut Kalaallit Nunaanni suliffeqarfinniit Danmarkimi inuinnarnut suliffeqarfimmulluunniit nassiunneqartunut, imaluunniit Kalaallit Nunaanni inuinnarmiit Danmarkimi suliffeqarfimmut nassiunneqartunut sunniuteqassaaq, Tusass-imi attaveqartarnermut immikkoortortaqarfimmit Sermitsiaq.AG-mut ilisimatitsissutigineqarpoq.
- Allannguuteqarnermi nassiunneqartut Danmarkimi tigusisussap nioqqutip nalingata momsia aamma nassiussinermi aningaasartuutit akitsuuserisullu aningaasartuutaat akilertassagai, ilisimatitsissutigineqarpoq.
Akitsuusiinermi malittarisassat uku atuupput:
- 0-1.150 koruunit: Moms eqqussinermilu akiliutissaq illit akilertassavat
- 1.150 koruunit sinnerlugit: Moms, eqqussinermi akiliutissaq akitsuullu illit akilissavat
Momsi 25 procentiuvoq, nioqqutissallu nalinga, nassiunneqarnera akitsuullu tungnavigalugit naatsorsorneqartarluni, Tusass-imit ilisimatitsissutigineqarpoq.
Inuinnarnut malittarisassat allannguuteqanngitsut
Akitsuutit nutaat Danmarkip EU-llu akornanni atuuttussanngortinneqartut, inuinnaat akornanni nassiussinermut atuutsinneqanngillat, Tusass ilisimatitsivoq. Inuinnaat akornanni nassiussinermut malittarisassat qangali atuuttut atuutiinnassasut ilisimatitsissutigineqarpoq.
- Inuinnaat poortugaataannut tunngatillugit allannguisoqanngilaq, poortukkat Kalaallit Nunaanni inuinnarmit Danmarkimi inuinnarmut nassiunneqartut eqqarsaatigalugit malittarisassat maannamut atuuttut atuutiinnassapput. Tunissutissaq 360 koruunit inorlugit naleqarpat, akitsuusiisoqassanngilaq, Tusass-imi attaveqartarnermut immikkoortortaqarfimmit ilisimatitsissutigineqarpoq.
Tunissutissaq 360-1-150 koruunit akornanni naleqarpat, moms 25 procentiusoq eqqussinermilu akiliutissaq akilerneqartassaaq.
Danmarkimiit nassiussanut imaluunniit assersuutigalugu Kinamiit Kalaallit Nunaannut nassiussanut akitsuusit malittarisassallu allannguuteqartinneqanngillat.