Inatsisartut
Malittarisassat aalajangersimasut katsorsaanermut nukittorsaassapput
Ingammik imigassamik atornerluineq ilaatigullu hashimik atornerluineq Nunatsinni annertuumik ajornartorsiutigineqartoq ilisimaneqarpoq. Atornerluinermik katsorsaaneq maanna siullermeerluni inatsimmut ilanngunneqassaaq.
Atornerluinermik katsorsaaneq siullermeerluni inatsimmnut ilanngutsinneqassaaq. Peqqissutsimut naalakkersuisoq, Agathe Fontain (IA), ullumikkut Inatsisartunut inatsisissatut siunnersuummik saqqummiussisoq taama siunnersuuteqarpoq.
Malittarisassat ersarissut aamma qitiusumik ataqatigiissaarinerup katsorsaaneq sunniuteqarnerulersinnissaa, taamaalillunilu ataasiakkaat inuiaqatigiillu aningaasartuutinut annertuunut sipaarfigineqarnissaat siunertaavoq.
Atuaruk: Suleqatit imigassarsunnippa?
Atornerluineq akisuvoq
Imigassamik atornerluinerup inuppassuit inuunerat aserortaraa aamma inuiaqatigiinnut akisusoq nutaarsiassaq annertuujunngilaq. Inatsisartunit naliliinerup 2014-imi ingerlanneqartup takutippaa, suliniuteqarneq sunniuteqarnerusariaqartoq.
- Nassuiaammi eqikkarlugu takutinneqarpoq angusaqarluarniarluni iliuuseqarnermi iluanaarutissaqarluartoq Kalaallit Nunaanni aanngajaarniutinik atornerluinermik annikillisaataasinnaasunik, Agathe Fontain (IA) siunnersuummut oqaaseqaammi allappoq.
Imigassaq inuunermik naleqartitsisartoq nassuiaammi erseqqissarneqarpoq, taannalu naartumik peersitsinermut, toqungasumik meerartaarnermik aamma naartup qarasaanik ajoqusiisinnaanermut ulorianartorsiortitsineq annertusisartoq.
Atuaruk: Imigassamut ikiaroornartumullu akiuiniarluni annertusisamik iliuuseqarneq
Sulineq aallartereertoq
Imigassamik, ikiaroornartumik hashimik aamma aningaasanoorajunnermik atornerluinermik katsorsaanermik sulineq aallartereerpoq. Taamatullu aamma kommunini katsorsaavinnik aamma qitiusumik iliuuseqarneq Allorfimmi katersuunneqarpoq, ataatsimut suliniutit tassani ataqatigiissarneqassapput.
Tamanna 'nuna tamakkerlugu atornerluinermut iliuusissatut pilersaarut' 2015-imi akuerineqartoq aallaavigalugu pivoq.
Iliuusissatut pilersaarummi ilaat maanna inatsisinngulerput.
- Anguniagaq tassaavoq atornerluinermik ajornartorsiutit sapinngisamik suunerisa pilertornerpaamik paasineqarnissaat aamma atornerluisoq qanigisaasalu pilertortumik ikiorneqarnissaat, inatsisissatut siunnersuummi oqaaseqaatini tamanna allaqqavoq.
Katsorsaanerup sunniutai ersernerluttut
Tamatumunnga tunngasumik siornatigut inatsiseqarnikuunngimmat, inuit katsorsarneqarnissaannut neqeroorutit ersernerlussimapput. Tamatuma saniatigut paragraf atorneqartup kingunerisimavaa, inuit atornerluisuusut tamarmiunngitsut katsorsartinneqarsinnaannginnerat.
Maanna inuit tamarmik akiliinatik katsorsarneqarnissamut pisinnaatitaaffeqartut inatsisip erseqqissisippaa. Qaqugukkut katsorsartinnissamut neqeroorfigineqarsinnaanermut malittarisassat allaatigineqarput.
Tamatuma saniatigut katsorsaanerit sorliit iluaqutaasarnersut paasissutissanik katersuisoqalissaaq. Maannamut suut iluaqutaanersut iluaqutaannginnersulluunniit ilisimaneqarnikuunngilaq.