Malik: DTU-mit ilaquttagut nuannaraagut
Borgmester Malik Berthelsenip DTU-p Sisimiuni aamma Nunatsinni suliaasa pingaassusaat oqaatigai.
Qeqqata Kommuniani borgmesteri, Malik Berthelsen, DTU laboratoriartaavinik ammaanersiornermi oqalugiartut ilagaat.
Issittumi ingeniøritut Sisimiuni aamma Lyngbymi ilinniartut laboratorianik iluaqutiginnittussat ilagaat.
Malik Berthelsenip oqalugiarnermini kunngissap aamma DTU-p qanimut atassuteqarnerat eqqaavaa.
- Frederik amma Anders (Bjarklev, DTU-mi rektori, aaqq.) ilaqutariinnut Kalaallit Nunaannut kissalaartumik misigissuseqaannaratik sinniisuupput, kisianni aamma misigissutsit uagut Nunatsinnit akiniartarpagut. Frederik kunngikkormiuni ilaqutatsinnut sinniisoralugu – aamma Anders DTU-mi ilaquttatsinnut sinniisoralugu, Malik Berthelsen oqarpoq.
- DTU-mit ilaquttat immaqa kunngikkormiusulli sivisutigisumik Nunatsinniinnikuunngikkaluarput, kisianni ukiuni 20-ni kingullerni DTU-p aamma Teknikimik Ilinniarfiup akornanni qanimut suleqatigiinneq ingerlalluarpoq.
- 2001-imili issittumi ingeniørit ilinniartinneqartut semesterini pingasuni siullerni Sisimiuni sinaakkutini toqqissisimanartuni aallartinneqartarput, ilinniartut taakku kingorna maanga Lyngbymut DTU-mi ilaqutariissuarnut ilanngukkiartortarput.
- Juunimi ataatsimoorluta issittumi ingeniørit 100-ssaat ilinniakkaminik naammassinnittoq nalliuttorsiutigaarput.
DTU-p Sisimiuni ilinniarfiup teknikikkut ilisimatusarfinngortinniarlugu pilersaaruteqarpoq, issittoq tamakkerlugu sammisarineqassalluni. Pilersaarutit taakku aamma borgmesterimit nuannaarutigineqarput.
- Ilinniakkat nutaat aallartisarneqarput, issittumi fiskeriteknologi-ingeniøritut ilinniagaq suliap annertuup tullerigaa takullugu nuannerpoq – Kalaallit Nunaannilu attuumassuteqartut tamarmik tapersersuipput – Namminersorlutik Oqartussat, Sulisitsisut aamma Nunatsinni inuusuttut.