Malik: Assigiinngitsumik atugaqarmeq nalimmassarneqassaaq

- Anguniakkakka qineqqusaarneq allartippat aatsaat saqqummiutissavakka, Malik Berthelsen Sisimiuniit Sermitsiaq.AG-mut oqarpoq.

Qinerneqaqqinnissani anguniarniarpaa, erseqqissaatigaali qinersisartut tassaasut kia borgmesterinngornissaanut apriilip arfernani aalajangiisussat.

- Soorunami neriuutigaara qinersisartunit qinerneqaqqissallunga, Malik Berthelsen inuttutu nukittussutsiminik taasaqartoq erseqqissaavoq:

Innuttaasut akisussaaqataasut

- Borgmesteriuniaraanni tarnikkut timikkullu nukittuujusariaqarpopq. Kommunalbestyrelsimi sulinermik misilittagaqarluarpunga, isumaqarpunga borgmesteriulluarlunga erseqqissumik siunnerfilik. Aamma isumaqarpunga, innuttaasut akisussaaqataanissaannik oqariartuuteqartarnera nukittuussuseqarnerma ilagingaat, Qeqqata Kommuniani Siumumi siuttoq nassuiaavoq.

Kommunerisat ukiut sisamat kingulliit ingerlaneranni Naalakkersuisunit tapersersorneqarlunilu ikorfartorneqartarsimava?

- Naluneqanngitsutut Kangerlussuarmi timmisartoqarfiup aamma Kangerlussuup Sisimiullu akornanni aqqusineqarnissap siunissamut pitsaasumik aningaasaliissutigineqarnerisa iluaqutaasussaaneri pingaartumillu siunissami nunami tamarmi takornariaqarnermut periarfissagissaartitsinerisa uppernassusaannik sorsuuteqarsimavugut. Isertuutissanngilaralu suliniummut tunngatillugu Naalakkersuisut pinaasertarnerat malugisimagatsigu, naaka takornariartitsisartut Visit Greenladillu anguniakkavut tapersersimagaluaraat, Malik Berthelsen oqarpoq.

Suliffeqarfiit nuunneqarlik

Siunissaq pillugu aamma Naalakkersuisunit Inatsisartunilu politikkerinit Qeqqata Kommunianut iluaqutaasinnaasunik sunik ikiorsiissuteqartoqarsinnaanersoq pillugu Malik Berthelsen imatut oqarpoq:

- Nuup kommunillu allat naligiinnginnerulernissaat pinngitsoortissagutsigu, Namminersorlutik Oqartussat suliffeqarfiutaat Nuummiit sineriammut nussorneqartariaqarput. Sanaartornerummi ilaannaanik nunap immikkoortuinut allanut nuussineq naammanngilaq. Namminersorlutimmi Oqartussat allaffeqarfiini sulisut tamarmik nunap aningaasaqarneranik aamma kaaviiaartitsilluartarput, assersuutigalugu sanaartornikkut, neriniartarfeqarnikkut aamma sumiiffiit pisiniarfiinut pisiniartarnikkut, Malik Berthelsen oqarpoq, nangillunilu itisiliilluni:

- Taamaammat suliffeqarfinnik nuussinikkut kommunit allat malunnaatilimmik qaffaassutigissavaat. Kikkullu tamarmik Nuummi najugaqarusunnerarneqartarnerat upperinngilara, ilinniarluarsimasummi Nuummi najugaqartariaqartutut misigisimasarput, tassani ilinniakkaminnut naapertuuttumik suliffissarsisinnaagamik.

Kommunalbestyrelsimi maanna ilaasortat

Siumut kommunalbestyrelsimi ilaasortaasunit 15-iusuni qulingiluanik ilaasortaatitaqarluni ullumikkut amerlanerussuteqarluarpoq.

Siumut:

Malik Berthelsen

Gideon Lyberth

Evelyn Frederiksen

Hans Frederik Olsen

Frederik Olsen

Ruth Heilmann

Jakob Olsen

Erik Jensen

Henrik Fleischer

Inuit Ataqatigiit:

Juliane Enoksen

Axel Lund Olsen

Atassut:

Siverth K. Heilmann

Emilie Olsen

Anna Karen Hoffmann

Partii Naleraq:

Jens Meeraq Lyberth