Malik Arctica Ittoqqortoormiinut apuussimavoq
Malik Arctica Ittoqqortoormiinut ukiuunerani peqqumaatissanik arlaleriarluni anngussiniaraluareerluni apuussimavoq, Royal Arctic Line ilisimatitsivoq.
Malik Arctica sapaatip akunnerini kingullerni sikorsuit pissutigalugit ingerlariaqqissinnaasimanani, pingasunngornermi ullup-qeqqata siornatigut kiisami Ittoqqortoormiinut apuussimavoq.
Royal Arctic Line Facebookikkut allappoq, Malik Arctica illoqarfiup eqqaani kisaqqasoq, pramillu atorlugik ukiuunerani peqqumaatissanik illoqarfimmut apuussuisoq.
- Umiarsuup usingiarneqarnera arfininngorpat oktobarip 23-ani naammassissangatinneqarpoq, umiarsuarlu Nerlerit Inaannut ingerlaqqissaaq ulloq taanna tikissangatinneqarluni, Royal Arctic Line allappoq.
Royal Arctic Line oktobarip arfineq-aappaani ilisimatitsivoq, Malik Arctica Ittoqqortoormiit eqqaanni sikorsuit pissutigalugi ingerlariaqqinnaveeqqasoq.
Umiarsuaq kingusinnerusukkut illoqarfimmut apuulluni usiminik usigiaaqqaarani Reykjavikimut orseriartorluni pissamaatissaminillu pisiniarluni ingerlaqqittariaqarsimavoq.