Maliina soraarsitsineq pillugu: Politikikkut aalajangiineq

- Taama pisoqarnissaanik tusagaqarsimanngilanga, Maliina Abelsen Sermitsiaq.AG-mit qinnuigineqarami Visit Greenlandimi siulersusisut siulittaasuattut soraarsinneqarnerminut suna pissutaanersoq oqaluttuareqqqulugu, nassuiaavoq.

- Immikkut ittumik ataatsimeersuarnissaq, tusarsimanngisara, sioqqullugu sianerfigineqarpunga, ilisimatinneqarlungalu siulittaasuujunnaartunga. Soorunami apeqqutigivara suna pissutaanersoq, ilisimatinneqarpungalu politikkikkut aalajangiinerusoq. Tassa taamaappoq, nuannaarutigaarali suliarisimasakka pissutaanngimmata. Nalunngilara suliaqarluarsimallunga, Air Greenlandimi siusinnerusukkut pisortaasimasoq aamma Grønlandsbankenip siulersuisuini ilaasortaasimasoq oqaluttuarpoq.

IA-mi politikkeriusimanerit tamatumunnga pissutaava?

- Neriuppunga tamanna pissutaanngitsoq, taamaattussaanngilarmi. Qimarratigisinnaanngilarali IA sinnerlugu politikkikut suliaqartarsimanera Naalakkersuisuusimaneralu. 2013-imili Arctic Winter Games aquttussanngorakku politikkimit anivunga. Tassanimi pineqarmat Kalaallit Nunaannik tamani ataatsimoortitsinissaq, sooq imatut imatullu iliornersunga politikkikkut eqqarsaasersuutigineqannginniassammat. Taamaammat polikki qimavillugu qimappara, Maliina nassuiaavoq.

Uteqqinnianngitsoq

- Siunertarinngilara – uterpara – siunertarinngilluinnarpara politikkimut uteqqinnissara, Maliina Abelsen aalajangersimasumik nipeqarluni eseqqissaavoq, peqatigitillugulu illoqarfiit pingaarnersaanni borgmesterinngorniarnissamut soqutiginninneranik tusatsiakkat taamaalilluni akerlilerlugit.

- Naamik, akerlianik siulersuisuni sulineq nuannareqaara. Siulittaasuujunnaarnerali annerilaarpara, takornariartitsisarnermi Kalaallillu Nunaata soqutigisaanik nittartaassisarneq soqutigisarilluinnarakkit. Air Greenlandimi taamaatissallunga aalajangernermi kingorna, ukiup affaa kingulleq manna atorlugu immikkut piffissaqarfigilluarsimavara, takornariartitsinissamut nittarsaassinissamullu periusissiap pitsaalluinnartup suliarinissaa, taannalu tunniunneqaqqammerpoq, Maliina Abelsen oqaluttuarpoq.

- Soorunami ajuusaarutigaara, Kalaallit Nunaata takornariartarfittut inerisarneqarneranut peqataajunnaarnera. Qularinngilluinnarpara, siunnerfeqartumik nittarsaassinissaq pilersaarusiorluakkanillu suliaqartarnissaq pisariaqartoq. Tamanna siuttuuffigerusussinnaangaluarpara. Minnerunngitsumik COVID-19-ip atuunnera qaangiuppat. Kalaallit Nunaanni takornariartitsisartut misigisassarsiortitsisartullu kiisalu suliffeqarfiit takornarianik sullissisartu COVID-19-imik eqqugaanerpaapput, Maliina Abelsen sociologitut ilinniagalik erseqqissaavoq.

Suliamik ilisimasaqarneq

Kingumut qiviartarluni sooq soraarsitsisoqarnersoq eqqarsaatigisarsimaqaa.

- Neriuppunga inuit piginnaasaqarluartut, politikkikkut suliaqartarsimanerat pissutigalugu soraarsitsisoqarsimasanngitsoq. Tamannami nunap akissaqartinngilaa. Soorunami inuuvunga isummrsortartoq, AWG-mili sulingama inuiaqatigiinni oqallittoqarneranut peqataanaveersaarsimavunga, tamannami arlaatigut politikkimut ajornnangitsuaqqamik atatinniarneqarsnnaammat. Ajuusaarnassaqaaq suliarisimasat tunngavigalugit naliliisoqarsimanngippat, Maliina Abelsen erseqqissaavoq.

Siulersuisuni siulittaasup saniatigut Erik Bjerregaard Johanne Bechilu aamma ilisimatinneqarput, Visit Greenlandip siulersuisuini ilaasortaajunnaartut.

Siumukkormiut ilaasortanngortinnqartut

Siulersuisuni ilaasortanngortut nutaat tassaapput, Pitsi Høegh, Inatsisartuni siusinnerusukkut sinniisussaasimasoq Siumullu sinnerlugut folketingimut qinigassanngortissimasoq, aamma uini Kenneth Høegh, Nunanut Allanut Naalakkersuisoqarfimmi pisortaq peqatigalugu Greenland Sagalandsimik piginnittoq. Kenneth Høegh Malinna Abelsen sioqqullugu Visit Greelandimi siulittaasuusimavoq.

Tamatuma saniatigut Erik Bjerregaardip Hotel Arcticimi kingoraartaa Morten Nielsen ilaasortanngortinneqarpoq. Pingajuattullu ilaasortanngortinneqartoq Mia Scheel Københavnimi arkitektiuvoq, taanna titartaasarfimmi Zeco Architecsimi piginneqataasuusoq takornariartitsisarnermik misilittagaqarpasinngilaq.