Maligassiuilluartoq – ajutoornissami tungaanut
Nauja Lynge ukiuni 40-ni manniup qalipaata iluaniissimavoq. Pisuusaartuusimavoq. Kalaaliunini miserratigalugu. Maanna atuakkiorsimavoq ”errortassaativut ipertuut Danmarkimi illoqannginnersani qanoq ililluta nivinngartarsimanerivut”. Assigiinngisitsinerlu pillugu.
Nauja Lynge inuusukkallarami sapinngisani tamaat kalaaliunini isertuunniarsimavaa. Nutsani qaamasumik qalipallugit. Kalaallinik illaruaatit illaatigisarlugit.
Klassimi niviarsiaqqat quianartortarisimavaat. Ikinnguterpassuaqarluni. Danmarkimilu ingerlalluarsimavoq.
Arnaa, Ella Lynge, avinnermi kingorna Danmarkimi Horsensimut nuussimavoq. Nauja Lynge taamani arfineq-pingasunik ukioqarpoq, aallaqqaammullu angerlarsimaffini Nuuk qimakkamiuk aliasuttorujussuusimavoq.
- Anaanaga oqarpoq ukiup affaani siullermi kipisuitsumik qiasimasunga, Nauja Lynge oqaluttuarpoq.
- Ataataga nuannarisorujussuusimavara. Tarneqatigaara. Ataatama niviarsiaraatigisimavaanga. Kalaallit Nunaanni peroriartorneq nuanningaarami nalissaqarsimanngilaq. Danmarkimut nuuttussanngoratta allaanngilaq qitikkut kipineqarlunga. Qatanngutigalu arnaq qernertunik qilerteqarsimavugut, taakkualu Horsensimi iginneqarput.
Danmarkimiinnini sungiukkiartorpaa ”maligassiuilluartunngorlunilu”.
- Anaanaga kuussaanngitsuusimavoq. Qatanngutigiit arnat marluulluta perorsarneqarpugut eqqorluinnartumik pissuseqassasugut, tamatigut piffissaq eqqorlugu takkuttassasugut. Tamannami qallunaat pingaartitaraat, taanna oqarpoq. Tamatigut uppernarsartartussaasimavara taakkunannga pitsaanerullunga, Nauja Lynge eqqaamanilersaarpoq.
- Ukiuni 40-ni kalaallinit kingoqqisuullunga miserratigisimavara. Danmarkimi kalaallit pillugit isummiutiinnakkat atorusunngilluinnarsimavakka. Manniup qalipaata iluaniissimavunga. Pisuusaartuullunga. Uangarpiaananga.
Nauja Lynge-p kalaaliunini miserratigiunnaarneraa AG-imi atuaruk.