Malene Vahl Rasmussen: Qaqortup mittarfissaa naannerussanngilaq
Demokraatit ersarissuliorput: – Mittarfissap naalineqarnissaa siunnerfigineqassappat peqataassanngilagut, aamma aningaasanik amerlanerusunik pisariaqartitsisoqassappat nassaarniarnissamut peqataassaagut, Malene Vahl Rasmussen (D) Sermitsiamut oqarpoq
Aningaasat mittarfissamut atugassatut killiliunneqarsimasut 800 milioner koruunit nalinginut Qaqortumi mittarfissaq pillugu Kalaallit Airports Domestic-ip suliariumannittussarsiuussigaluarnera iluatsinngitsoorpoq. Kair aamma Naalakkersuisut tamatuma kingunerisaanik mittarfissap naannerusinnaaneranik periarfissaqartoq tikkuussipput. Tamannali Demokraatit peqataaffigerusunngilaat:
– Mittarfissap takissusissaa pillugu pilersaarutaareersumit 1.500 meterinit naannerussanngilaq. Neriuutigaarput Kair suliariumannittussarsiuusseqqinnissamini aningaasat atugassiissutaasut iluini isumaqatigiissuteqarsinnaassasoq, tamannali pisinnaassanngippat, tamatumalu malitsigisaanik aningaasat amerlanerusut pisariaqartinneqalissappata, taava uagut piareersimavugut aningaasanut inatsisissap isumaqatigiinniutigineqarneranut atatillugu aaqqiissutissarsioqataanissamut, Demokraatit aningaasaqarneq pillugu oqaaseqartartuat, Malene Vahl Rasmussen aviisimut Sermitsiamut oqarpoq.
Kujataani ineriartorneq pitsaasup tungaanut saappoq
Demokraatit tungaanniit mittarfissap takissusissaanik aalajangiusimanninnerminnut atatillugu Malene Vahl Rasmussen-ip innersuussutigaa Kujataa maanna pitsaasup tungaanut ineriartornissamut aatsaat taamak periarfissagissaartiginera, ilaatigut aamma aatsitassarsiorfiutileqatigiiffik Tanbreez, Killavaat alannguani aatsitassanik qaqutigoortunik piiaanissamut akuersissummik pissarseqqammertoq innersuussutigalugu, maannalu apeqqutaaginnalernerarpaa Kujataani aatsitassarsiornerup aallartivinnissaanut:
– Pinngitsoorani angallanneq annertuseriarujussuassaaq, aatsitassarsiorneq sivisuumik utaqqineqarsimasoq aallartinneqarpat. Taannaannaanngilarli. Kujataa tamarmi attaveqaqatigiinnikkut pitsaasumik aammalu innuttaasut pisariaqartitaannut naapertuuttumik inerisarneqartariaqarpoq. Demokraatiniit uagut qulanngilluinnarpugut, siunissaq ungasinnerusoq isigalugu, aningaasaliineq taanna pitsaalluinnartuussasoq aammalu nunap immikkoortuani ineriartortitsinermut annertusaaqataassasoq, Malene Vahl Rasmussen (D) tikkuaavoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: