Malaysiamiup inissialiorniarnera sakkortuumik isornartorsiorneqartoq
Malaysiamiup aningaasaatilissuup Nuup Qinnguani Eqingami inissianik sanaartortitsiniarnera aatsaat taamak isornartorsiorneqartigaaq.
Inissiat katillugit 98-inik inissiartallit, taakkununnga ilaallutik illu ataatsimoorfiusartoq timigissartarfilik, cafe, pisiniarfik aammalu innuttaasunut ”saqisaarluni aneerasaartarfik” immami pisuttuartarfik puttasoq, tusarniaassutigineqarmat inuinnaat 28-t namminneq inuttut tusarniaanermut akissuteqarsimapput. Aamma Nuummi Najukkami Ataatsimiititaliaq suliniummut tunngatillugu ernumassutigisaminik oqaaseqarsimavoq.
Inissisimaffissaa pingaartumik isornartorsiorneqarpoq, aamma katiterutissat nunanit allaniit tikisillugit katitikkanik sanaartorniarneq isornartorsiorneqarpoq.
Nuummi Najukkami Ataatsimiititaliaq isumaqarpoq, suliniutissatut siunnersuut pillugu pilersaarut ”avatangiisinut naleqqutinngitsoq aammalu avatangiisinut kuullu kuunneranut sunniuteqarnerlunnissaa pillugu akerliuffigineqartoq”. Oqaatigineqartoq kingulleq pillugu Sanarfinermut Avatangiisinullu Ingerlatsivimmit suliniummut qinnuteqaat tunngavigalugu Namminersorlutik Oqartussanik avatangiisit pillugit nalilersuinissap aallartinneqarnissaata oqaloqatigiissutiginissaa, akissutigineqarpoq.
Sanarfinermut Avatangiisinullu Ingerlatsivimmit nalilerneqarpoq, Berjaya Greenland Invest A/S-ip suliniutaa arlalitsigut pitsaaqquteqartoq.
- Ataatsimut isigalugu, illoqarfiit pingaarnersaanni inissaaleqisoqarnerujussua pissutigalugu
soqutigisalik nutaaq taamak annertutigisumik inissialiortiternissamik aningaasaliissuteqarusummat soqutiginarpoq. Tamatuma saniatigut pilersaarut soqutiginarpoq, modulikkaarlugit suliaagami, Nuummi takuneqanngisaannartut, pingaartumik taama annertugitillugit, ingerlatsivimmi pisortaq Hans Henrik Winther Johannsen allappoq.
Suliniutissatut qinnuteqaat aggustusip pingajuani Sanarfinermut Avatangiisinullu Ataatsimiititami politikkerinit suliarineqassaaq. Politikkerillu suliniut itigartissappassuk, pilersaarut unitsinneqassaaq. Akerlianik politikkerit qinnuteqaat Aningaasaqarnermut Inuussutissarsiornermullu Ataatsimiititamut ingerlateqqinneqarnissaa aalajangerpassuk, suliaq kommunalbestyrelsimut ingerlateqqinneqassaaq.
Malaysiami akunnittarfiuteqarlunilu takornariartitsisartup Berjaya Land Berhadip nalunaarutigimmagu, Nuummi akunnittarfissuarmik sanaartornissamut piareeqqasoqartoq, tusagassiorfinni sammineqarlunilu borgmesterimut Charlotte Ludvigsenimut nuannaartitsisimavoq. Aallaqqaammut Nuutoqqamiinnissaanik aalajangersimaneq taamaatiinnarneqapallappoq, Nuummi innuttaasorpassuit tamanna akerlerilluinnarmassuk.
Berjaya Land Berhadili Nuummi akunnittarfissuarmik sanaartonissamik suli pilersaaruteqarpoq, akunnittarfissalli sumi inissisimanissaa suli aalajangiunneqanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
