Mala: Paarlakaattumik politikkeriuneq imaannaanngitsoq
Inatsisartunut upernaaq qinersisoqareersoq Siumumit Mala Høy Kuko pingasoriarluni Inatsisartuni ilaasortanngorlunilu ilaasortaajunnaarpoq. Siumumi qinikkani sinniisutut sisamaattut inissisimaneq imaannaanngitsoq isertuutinngilaa
Siumup sisamaattut sinniisua Mala Høy Kuko Inatsisartuni ilaasortaajunnaaqqippoq. Simon Simonsenip naalakkersuisunut ilaasortaajunnaarpoq, Inatsisartunilu ilaasortanngorluni, Mala Høy Kuko-mut sunniuteqarluni.
Politikeritut inuuneq imaannaanngilaq, tamanna ullut kingulliit Mala Høy Kuko-mut malunaateqarpoq. Tassami pingasunngormat paasitinneqarpoq Simon Simonsen sapaatit akunnerini marlunni napparsimanini pissutigalugu sulinngiffeqarnini sivitsussagaa.
Ilaasortaajunnaariasaarneq
Sisamanngormat Siumup Inatsisartuni ilaasortaatitaani ataatsimeeqataavoq, tassani Inatsisartuni suliassani suliarissallugit naatsorsuuteqarluni.
Allatulli pisoqarpoq.
- Ataatsimeereernitta kingorna paasitinneqarpunga Inatsisartuni issiavinnut ingikkiartortariaqanngitsunga, tassami Simon Simonsen Inatsisartuni ilaasortanngorniarluni aalajangersimavaa, Mala Høy Kuko oqarpoq.
Imaannaanngitsumik misigisat
Aamma allanik misigisaminik oqaluttuarpoq.
Doris J. Jensenip naalakkersuisuujunnaarnerani Mala Høy Kuko ataatsimiigiarluni New Yorkimiippoq.
- KNR-imit sianerfigitippunga aperitillunga Inatsisartuni ilaasortaajunnaarnera qanoq misigineriga. Aperineqarnerma nalaani susoqarsimanersoq ilisimasaqanngilanga, partiip allaffianut paasiniaasariaqarsimavunga susoqarsimanersoq, Mala Høy Kuko oqaluttuarpoq.
Ilinniartitsisunngoqqissaaq
Taamatut politikkikkut inissisimarmi piareersarnissaq imaannaanngitsoq oqarpoq.
- Politikkikkut sunniuteqarsinnaanissaq imaannaanngitsuuvoq, tassami ataatsimiititalianut assigiinngitsorpassuarnut igeriunneqaqattaartarpunga, Siumut tunuliaqutaralugu politikeri oqarpoq.
Tasiilami ilinniartitsisuuvoq, maanna sulinngiffeqarallarluni, Kommuneqarfik Sermersuumilu aamma kommunalbestyrelsimi ilaasortaalluni.
Mala Høy Kuko Tasiilamut angerlassaaq pingasunngorpat, atuarfimmut sisamanngorpat suliartussalluni.
- Naak nikerarfiusumik ilaasortaagaluarlunga Inatsisartuni sulineq maqaasissavara. Suleqataanera nuannareqaara. Inatsisartunut ilaasortanngoqqissinnaanera piareersimaffigaara. Naak partiit assigiinngitsut isumaqatigiinngissuteqarlutik assortuussinnaasaraluartut kammagiittaqaagut, tamanna ilaatigut maqaasissavara, oqarpoq.