Makka Kleist Ærømi eqqissisimaarfissarsisoq
Inuit naligisutut naapinnissaat Makka Kleistip ilungersuutigiuarsimavaa aamma naak inuunini tamaat nikagineqartutut misigisarsimagaluarluni. Ullumikkut Danmarkimi qeqertamut Ærømut nuussimavoq, tassani soraarnertut inuulluni, Kalaallilli Nunaata isiginnaartitsinikkut oqaluttuassartaa naammasseqqajangikkaluarlugu.
Ærøskøbingip qeqqani saffiuup illutoqaa inuit sanioqqukkaangamikku unillutik qimerloortarpaat. Igalaap saaniipput tupilaaqqat, ukkusissamik aarriit parkanillu kavaajallit qiperukkat – kalaallit Norgemiullu erfalasuinik kiisalu Ærøp nammineq erfalasuanit qalipaaterpassualimmit avatangiiseqarlutik.
Illumi sungaartumi alutornartumi isiginnaartitsisartoq Danmarkimi eqqissisimaarfissaminik nassaarsimavoq.
- Ilaa nuanneq? Makka illunnguami teqeqqorpassualimmi nuannersumi takuniaatitsinermini aperaaq.
Makka uialu Norgemiu Svenn Syrin Ærømi decembari 2018-imili najugaqarput. Makkap peqqissusaa annerusumik peqqutigalugu aappariit Nuummiit Danmarkimi qeqertannguamut Ærømut nuussimapput.
Makka assammigut gigteqarpoq fibromyalgimillu nappaateqarluni, taamaalilluni saanermigut, naggussamigut nukimmigullu anniartarluni, qiianartumi annertuumik ajorseriartarluni. Ærømi qeqertami nakorsat ataavartut ilaanni nakorsiartarpoq, tassani anniaatiminut ikiorserneqarsinnaasarluni.
Ærøp toqqarsimanera nalaatsornerinnaanngilaq. Aapparit aasat ilaanni sulinngiffeqarlutik Danmarkimi najugaqarfigisinnaasaminnik ujaasipput, naallu Ærøp saniatigut nuannersorpassuit takuniaraluarlugit qeqertaq tikeraaqqaagartik eqqarsaatiminni uteqqiaffigaat.
- Imminut tusaaniartuartariaqarpoq. Sumiiffik sorleq iluarineqarpa? Ærømi nuna assigiinngisitaaqaaq – qattuneqarluni, itissaaqarluni taserujussuaqarluni – maanilu nipaatsupilussuuvoq, tamannalu iluareqaara. Aamma sumiiffimmi najugaqarusuppugut tikikkuminaalaartumi, oqarpoq.
Immaqa Ærø kalaallinit soqutiginartinneqarpoq. Immaqa illoqarfitoqqami Ærøskøbingimi 900-nnarnik innuttalimmi kalaallit kulturimik ingerlataqartut arlallit naapinneqarsinnaammata. Eqqumiitsuliortoq Naja Abelsen tassani sulliveqarpoq erinniortorlu nipilersortunillu aqutsisoq Per Rosing nulialu Susanna Rosing Ærøskøbingimi aamma nunasisimallutik.
Makkammik ilisarititsineq tamakkerlugu Arnanut-mi nutaami atuarsinnaavat.