Majuartaat aatsaat februaarimi ammassaaq
Illoqarfimmi apummik assartuilluni ilungersorluni sulisoqaleruttorpoq, majuartaatip eqqaa sisusarfiillu apummik immerneqarniassammata, taamaattorli Nuummi sisorartartut tamaani sisorarsinnaanissartik februaarimut utaqqisittariaqassavaat.
Nuummi majuartaammi sulisut apeqqaarsimalaaginnalersorlu illoqarfimmiunit utaqqisinnaanngitsunit saaffigineqallattaalersarput, apeqqutigineqartarluni qaqugu sisorariarsinnaalissanerlutik. Sisorartarfiit maanna apummik qallerneqarsimalerput, taamaattorli majuartaatip minnerup ammarnissaa aatsaat sapaatip akunneri pingasut sisamalluunniit qaangiuppata pisinnaassaaq.
- Inuit majuartaatip qaqugu ammarnissaa paaserusullugu saaffiginnittarmata paasisinnaalluarpakka, ingammik massakkut sisorartarfiit apummik qaqqorissumik apisimalermata. Massakkulli ammarsinnaanngilarput, tassami apummik suli amigaateqartorujussuugatta, ammarsinnaassaguttalu aputeqarnerujussuusariaqarami, Sisorarfinni ingerlatsinermut aqutsisoq, Bruno Heilmann oqarpoq.
Sila Sisorarfinnut ukioq manna ilungersunartorsiortitsisimavoq. 2021-mi novembari aallartilaartoq apigaluarpoq, siallerneratigulli aputaaruteqqilluni. Aatsaalli maanna januaarip aallartinnerani nuna apummik qallerneqarpoq.
Mittarfiup eqqaanit apummik assartuisut
Bruno Heilmann nassuiaavoq, majuartarfimmi sisusarfiit apummik qallersornissaannut apummik annertoorujussuarmik allamit assartuisoqartariaqartoq tamannalu nalunaaquttap akunnerpassuini suliarineqartarluni: Majuartarfik minneq apummik 8000 m3-imik qallersorneqassaaq tamatumunngalu 200 tiimit missaat atorlugit suliarisariaqarluni.
Allaaserisaq tamaat uani Sermitsiami pisiarisinnaasanni atuaruk: