"Maasi" arlaannut pituttorsimajunnaaqqippoq

Inuiaqatigiinni oqalliseqataasartoq Rappertartorlu Mads Pedersen (Maasi) atorfillit kattuffianni AK-mi 2018-imili atorfigisimasamini naggammik sulisimavoq. Siunissami suleriniarnini oqaatigerusunngilaa.

Akisuanerit, Festival, 2014, Katuaq

Mads Pedersen, "Maasi"-tut ilisimaneqarnerusoq inuiaqatigiinni oqalliseqataasarpoq, ukiunili kingullerni pingasuni atorfillit kattuffianni AK-mi sullissisut pisortaattut sulisimavoq.

Suliffigisimasaa pingasunngormat Facebookikkut allappoq, pingasunngormat naggammik sulisimasoq.

- Atorfillit Kattuffianiit Mads Pedersen sulilluarsimaneranut qujaffigerusupparput, suliarilerumaakkaminillu ajunngitsumik kissaallugu, atorfillit kattuffiannit allapput.

Mads Pedersenilli Sermitsiaq.AG-mit sianerfigineqarami siunissami suleriniarnini oqaatigerusunngilaa.

- Oqaaseqarusunngilanga, inuiaqatigiinni oqalliseqataasartoq nipangersimaannartanngikkaluartoq taamak naatsigisiumik oqarpoq.

Rappertartuulluni oqalliseqataasartoq

Mads Pedersen immaqa Prussic-ikkunni nipilersortartutut ilisimaneqarnerpaavoq, taakku inuiaqatigiinni pingaarutilinnik nipilersuusiorlutillu taalliortarput, soorlu aanngajaarniutinik atuisarnermut imminortarnermullu tunngassuteqartunik. Aamma aviisimi AG-mi immikkut allaaserisaqartarsimavoq, KNR-imi tusagassiortutut sulisimavoq IA-mi siunnersortitut sulisimalluni.

2019-imi maajip qaammataani isornartorsiuisaqqilersimavoq. Taamanikkut Kim Kielsenip naalakkersuisutut allatsigisimasaa Eqalu Høegh peqatigalugu saqqummiussisarlutik. Taakku marluullutik Meeqqagut utaqqikatapput Facebookikkut videoliarisarsimavaat, tassani politkkkerit nunami meeqqat kinguaassiuutitigut atornerlunneqartarnerannik ajornartorsiutaasunik iliuuseqanngittarnerarlugit isornartorsiortarsimavaat.

Eqaluk Høeghip Maasi Pedersenillu politikkerit tungaannit aaqqissuteqartoqarsinnaasoqanersoq tatigiunnaavissimavaat.

Mads Pedersenip Inatsisartunut qinersisoqalernerani AK-mi suliunnaarnera nalaatsornerinnaasinnaavoq. Aamma inuiaqatigiinni oqalliseqataasartoq politikkerinngorniarnersoq ajornartorsiutinillu rapperitut, aviisimi allaaserinnittartutut inuiaqatigiinnilu oqalliseqataasartutut ukiorpassuarni sammisarsimasaminik iliuuseqarniarnersoq eqqarsaasersuutigineqarsinnaavoq.

Powered by Labrador CMS