Maanna inatsiseqalerpoq: Meeqqat 12-it ataallugit ukiullit kanngutsaatsiliorfigineqarnerat pinngitsaaliineruvoq
Kinguaassiutitigut kanngutsaatsuliortarnerit pillugit inatsisip sukaterneqarnera akerliusoqarani akuerineqarpoq
Folketingimi ilaasortat tamarmik isumaqatigiillutik Kalaallit Nunaanni pinerlunnermut inatsisip allanngorneqarnera akueraat, kinguaassiuutitigut kanngutsaatsuliornerit sukaterlugit inatsisiliortoqarpoq.
Meeqqat 12-t ataallugit ukiullit kanngutsaatsuliorfigineqarnerat maannamit pinngitsaaliinertut pineqaatissiissutaajuaannalissaaq – qanoq pisoqarnera apeqqutaatinnagu. Taamatut kanngutsaatsuliorneq unioqqutitsineroreerpoq, kisianni maanna pinngitsaaliinertut nalilerneqartalerpoq.
Meeqqat pornoliaralugit tigummiaqarnermi aamma inatsisit sukaterneqarput. Manna tikillugu qarasaasiami meeqqat pornoliarineqarsimasut uninngasuutigigaanni unioqqutitsinerusarpoq. Maannamit internetikkut meeqqat pornoliarineqarsimasut ujartoraanni pineqaatissiissutigineqarsinnaalissaaq.
Aapparmik pinngitsaaliineq
Kiisalu aamma aapparisamik pinngitsaaliinermi sukaterisoqarpoq. Katissimatilluni nakuuserluni aamma sioorasaraluni pinngitsaaliineq aamma maanna tikillugu pineqaatissiissutaasareerpoq. Kisianni pineqartup assersuutigalugu aalakoornini pissutigalugu akiuussinnaanani pinngitsaalineqaruni, katissimagaluaraanniluunniit katissimanngitsutut unioqqutitsilluni pinngitsaaliinertut aamma pineqaatissiissutaasalissaaq.