qinersineq
Maanna allakkatigut qinersisoqarsinnaalerpoq
Kommunalbestyrelsimut qinigassanngortittut allattorsimaffiat kingusinnerpaamik februaarip 21-anni piareereersimassaaq
Nunatsinni kommunini tamani kommunalbestyrelsimi, ilagiillu sinniisaannut, kiisalu aamma Qaasuitsup Kommuniani Ikaarsaariarnermut ataatsimiititalianut ilaasortassanik 2017-imi aprilip ulluisa sisamaanni qinersisoqassaaq.
- Qinersisoqassatillugu pisarneq malillugu qinersisinnaatitaasut allakkatigut sioqqutsillutik qinersisinnaanissaminnut periarfissaqarumaarput, tamannalu januaarip aallartisimalernerani ullut nalinginnaasumik suliffiusut aallarteqqippata periarfissaalertussaavoq, Naalakkersuisut nittartagaanni paasissutissiinermi tamanna allaqqavoq.
Atuaruk: Sisimiuni Siumumi siulittaasoq nutaaq
Qinersinermut qinigassanngortittussat kingusinnerpaamik qinersinissaq sapaatip akunnerinik arfinilinnik sioqqullugu qinersinermik siulersuisunut nalunaarutigineqarsimasussaapput, tassa imaappoq kingusinnerpaamik marlunngornermi 2017-imi februarip 21-ani nassiunneqariissapput.
Qinersinerit tamarmik Kommunini qinersinermik siulersuisunit aqunneqartussaapput, taakkulu alajangiisinnaapput nunaqarfinnut aqutsisussanik qinersinerit ullormi allani ingerlanneqassanersut, tamaattumik innuttaasut kommuniminni qanoq periaaseqartoqarniarnersut arajutsinaveersaartariaqassavaat.