Maaji Nuan Nuuk ukioq manna piviusunngunngitsoorpoq
Maaji Nuan Nuuk pilersaarusiornissaanut akisussaaffik B-67-ip siulersuisuinut ingerlateqqinneqarsimavoq. Timersoqatigiiffiulli maajimi timersornermik peqqinnarnerusumillu inuuneqarnermut tunngasunik aaqqissuussinissamik suliaqarnissaq naammassisinnaasimanngilaa. Illoqarfinni allani timersortoqarluarpoq.
Illoqarfinni arlalinni maaji qaammat timersornermik sammisaqarfiulluartarnera sungiusimaneqalereersimavoq.
Ullumikkut tassa 3. maj 2022, Nuummili innuttaasunut Maaji Nuan Nuuk ingerlanneqartaraluartoq, suli sammisassaqartitsisoqanngilaq.
Maaji Nuan Nuuk-mi pilersaarusiortaraluartut Facebookiminni ilisimatitsipput maaji qaammat aaqqissuussisoqartarnera allanit akisussaaffigineqalersimasoq. Aaqqissuisussanilli nutaanik ujaasisoqarpoq.
Maaji Nuan Nuuk Facebookimini ilisimatitsivoq Maaji Nuan Nuuk B-67-ip siulersuisuinit akisussaaffigineqalersimasoq, taakkuli aaqqiissuussinissamut piareersarsinnaasimanngitsut.
Maaji Nuan Nuuk Sermitsiaq.AG-mut ilisimatitsivoq aaqqissuussanut akisussaasussatut neqeroorluni suli nalunaartoqarsimanngitsoq.
Illoqarfinni allani timiminnik aalatitsipput
Illoqarfinni allani pisarneq malillugu timersortoqarpoq. Aasianni ilaatigut arpatsitsisoqartassaaq, qititsitsinerit, timersoqatigiinnerit, pisuttuartitsinerit qajariartitsinerillu aamma ingerlanneqassallutik.
Ileqquulersimasoq malillugu Maajimi Peqqissuusa aallarnerlugu 2,6 kilometerinik isorartutingisumik 1. maj arpatsitsisoqarpoq.
Sisimiuni sisorarneq, triatlon, sikkilerneq, timersoqatigiinneq crossfitilu ilaatigut neqeroorutaapput. Qeqqata Kommuniata neqeroorutinut ilaatippaa kalattoorneq.
Uummannami sanigorserneq tarnikkullu peqqissuuneq ukkatarineqassapput. Ilulissanilu sammisassarpassuit aamma piareersarneqarsimallutik.
Ilulissani innuttaasut ilaatigut Piitannguaq Alaufesenimit oqalugiarfigineqassapput, oqallittoqassallunilu. Timersornermik neqeroorutit saniatigut suliffeqarfiit innuttaasunut aamma workshoppertitsissapput.