Lynge: Pompeop Pituffimmut tunngatillugu isumaqatigiissuteqarnissaq ammaffigivaa

- Mike Pompeo tusaaniarsorivara, isumaqarpungalu Pituffimmut tunngatillugu kiffartuussinissamik isumaqatigiissut piaartumik aaqqiissuteqarfiginiarniaraa, Steen Lynge ataatsimiittoqariitsiartoq Sermitsiaq.AG-mut ilisimatitsivoq, ataatsimiinnermut Danmarkimi nunanut allanut ministeri Jeppe Kofod aamma Savalimmiuni nunanut allanut naalakkersuisoq Jenis av Rana aamma peqataapput.

Steen Lyngep erseqqissaatigaa, ”kiffartuussinissamik isumaqatigiissutissamik nutaamik piffissami qaninnermi saqqumiussioqarnissaanik neriuuteqarluarluni”.

- Isumaqarpunga Pompeop kissaatigisavut pimoorullugit tigugai, Steen Lynge erseqqissaavoq.

Pompeomut qujassuteqarsimasoq

Steen Lyngep oqaatigaam Mike Pompeomik ataatsimeeqateqarneq ajunngivissumik ingerlasimasoq.

- Mike Pompeomut oqaatigaara, USA-p konsulatimik ammaaqqinnera nuannaarutigigipput. Aamma ilanngullugu oqaluttuuppara, Covid-19-imut misissuutissanut atatillugu ikiuutaasimasut qujassutissaqartugut, Steen Lynge ilisimatitsivoq.

Nunanut allanut Naalakkersuisup pingaartillugulu nuannaarutiginerarpaa, Mike Pompeop nunat taakku marluk suleqatgigiinnerisa nukittorsarneqarnissaanik kissaateqarnermut isumaqataanera.

- Pompeop erseqqissaatigaa, USA-p isumannaatsuunissaanut Kalaallit Nunaat pingaaruteqartoq, aamma nuannaarutiginerarpaa Kalaallit Nunaata USA-llu Nuummi konsulati nutaaq aqqutigalugu qanimut suleqatigiilernerat. Aap, ataatsimeeqatigiinnerput pitsaasuuvoq, takusinnaavara suleqatigiinnitta nukittorsarneqarnissaanik kissaateqarnerput isumaqatigineqartoq, Steen Lynge erseqqissaavoq.

Sakkulersorfiunnginnissaa

Isumannaallisaanermi politikki ministerit sisamat ataatsimiinnerani aamma oqaluuserineqarpoq.

- Kalaallit Nunaannit pingaaruteqartutut oqaatigaarput, Issittup sakkulersorfiunngittuarnissaata pingaaruteqarnera, aamma Kalaallit Nunaata aningaasaqarnikkut ineriartornerata inuiaqatigiinnut iluaqutaanissaata ukkatarineqarnissaa, Steen Lynge oqarpoq.