Lynge: Pompeo Pituffimmut tunngatillugu isummertinneqassaaq
Naalakkersuisup Steen Lyngep amerikamiut nunanut allanut ministeriat Mike Pompeo ataatsimeeqatigileruniuk, Pituffimmut tunngatillugu kiffartuussinissamik isumaqatigiissut, Kalaallit Nunaata ukiorpaaluit matuma siorna annaasimasaa oqaloqatigiissutigniarpaa.
Steen Lyngep amerikamiut nunanut allanut ministeriannik Mike Pompeomik ataatsimeeqateqarnissani qilanaaraa, pissutigalugu ”issiaqatigiilluni oqaloqatigiinneq suleqatigiilluarnerulernissamut aqqutissaammat, aamma nunat akornanni paaseqatigiissinnaaneq nukittunerulersinnaammat”, taanna oqarpoq.
Steen Lyngep Sermitsiaq.AG-mit apersorneqarnermini oqaatigaa, Pituffimmik kiffartuussinissamut isumaqatigiissut annaaneqarsimasoq pillugu suliaq mianernartoq Mike Pompeomut oqaloqatigiissutiginiarlugu.
- Pineqartoq pillugu amerikamiut ukiuni kingullerni Danmark peqatigalugu oqaloqatigisarsimavavut, Neriuutigaara tamanut iluaqutaasussamik aaqqiissutissarsiumaarluta: USA Kalaallillu Nunaat, tassani Kalaallit Nunaata USA-p nunatsinni sakkutooqarfeqarnerani aningaasatigut iluaquserneqarnerunissaa pissusissamisoorpoq, Steen Lynge isumaqatigiissut annaaneqarsimasoq, amerikamiut ingerlatseqatigiiffiutaanut tunniunneqanngikkallarmat, ukiumut 250 millioner koruunit missaannik isertitaqaassutigineqartartoq pillugu oqarpoq.
Tigussaasumik oqaluuserisassaqanngitsut
Steen Lyngep oqaatigaa, Danmarkimi Savalimmiunilu nunanut allanut naalakkersuisooqatini peqatigalugit Mike Pompeomik ataatsimeeqateqarnissamut oqaluuserisassanik tigussaasunik suli pissarsisoqanngitsoq.
- Nunattali imminnut ataqatigiinnerisa nukittorsarneqarnerat nuannaarutigaara, ilaatigut tamanna Nuummi konsulatimik ammaasoqarnissaanik aalajangiisoqarsimaneratigut takuneqarsinnaavoq, Steen Lynge oqarpoq.
- Kulturip, ilinniartitaanrup inuussutissarsiornerullu iluini suleqatigiinnerulernissamut tamanna periarfissiivoq, tassanimi suli tigussaasumik atuutsitsilernissaq amigaatigaarput, Steen Lynge tassunga atatillugu ingerlaqqittoqarnissaanik neriuuteqartoq oqarpoq.
Naatsorsuutiginngilaa, ataatsimeeqatigiinnermi sakkutuunut tunngassuteqartunik oqaloqatigiissuteqartoqarnissaa, soorlu Kalaallit Nunaanni amerikamiut sakkutooqarnikkut annertusaanissaannut tunngassutilinnik.
- Københavnimi ataatsimeeqatigiinnissatsinnik isumaqatigiissuteqaratta tamanna oqaluuserisassanut ilaatinneqanngilaq, Steen Lynge ilisimatitsivoq.
Qaaqqusisoqarnianngittoq
Mike Pompeop Nuummut pilersaarutaasutut tikeraarnissani maajip qaammataani kinguartissimavaa.
-Ataatsimiinnissinni Pompeo pisortatigoortumik qaaqqussamaarpiuk?
- Naamik, tamanna pilersaarutaanngilaq. Qularutigineqassanngilarli nunatsinnut tikeraarniartut tamarmik Naalakkersuisunit tikilluaqqusaammata, Steen Lynge erseqqissaavoq.
Steen Lyngep inuttut misigisassaasa annersat ilagissannguatsiarpaat, nunanut allanut ministerimik inunnut millionilippassuarnut sinniisuusumik naapeqateqarnissaq.
- Soorunami Kalaallit Nunaat sinnerlugu ataatsimeeqateqarnissaq angisuujuvoq. Neriuutigeqaaralu naalakkersuisutut nunat allat nunanut allanut ministeriinik ataatsimeeqateqarnissamut periarfissaqarnissara, nunanik amerlanerusunik suleqateqarnerput pitsaanerulersinniarlugu, taanna oqarpoq.
Angummik taamak pissaaneqartigisumik ataatsimeeqateqarnissat annilaaggangilaarpiuk?
- Annilaangallunga… Imatuunngitsoq. Misigisassaq annertuvoq pissanganarlunilu. Tamanna qularutigineqassanngilaq, Steen Lynge nassuerpoq.