Lykke: Nuannerlunilu pissanganarsimaqaaq

Lykke Frank Hansenip Danmarkimi assammik arsartut pitsaanerpaat arsaqatigisalernissaannut qaammatit sisamat matuma siorna periarfissaqalerami tigulluarpaa. Nykøbing Falster Håndbold Kalaallit Nunaanni sungiusaatigalugu unammisaqattaarmat isumaqatigiissuteqarfigisimavaa.

Siumut utimullu

Lykke Frank aggustusip qaammataani Nykøbing Falsterimi sapaatip akunnerini marlunni misiligummik sungiusarsimavoq. Klubbimut Lykkemullu tamanna soqutiginaqimmat, Lykke Frank Hansen Nuummut utersimavoq pigisani isumagiartorlugit. Ulluni aqqalinilinni Nuummiissimavoq. Inigisani attartoreriarlugu septembarip aqqarnani Danmarkimut utersimavoq assammillu arsarnissamut piareerluni.

Alloriarneq annertooq

Lykke Frank Hansenip Sermitsiaq.AG-mik oqaloqateqarnermini isertuutinngilaa, Nuummi inuussutissarsiutiginagu unammisartuunermiit Danmarkimi inuussutissarsiutigalu unammisartunngorneq alloriarnerusoq annertooq.

- Sapaatip akunneranut sisamariarluta sungiusartarpugut. Saniatigut qasujaallisarluta sungiusartarluta. Sapaatip akunnerilu tamaasa unammisarluta. Sungiusarnitsinni 100%-imik eqqummaarinniartuartussaavugut.

- Qaammatini sisamani Danmarkimi assammik arsartartutut misigisakka naatsumik oqaluttuarissagukkit, nuannersimaqaaq, assoroornarsimavoq pissanganarlunilu. Unammilligassat soorunami annertusimaqaat, Lykke Frank Hansen oqaluttuarpoq nangillunilu:

- Assammik arsartartutut angusaqarusuppunga.

- Ajoraluartumik neriuutigisamasattut unammeqataavallaarsimanngilanga. Ajoqusersimasorpassuit unammisarnerillu sakkortusarneri pissutigalugit pointinnanniarnermi sungiusaasut qularnaannerusunik arsartoqartarnissaanik toqqaasarnerat paasinarpoq. Isertinneqallattaarsimavugna ataasiakkaanillu isertitsisimallunga. Det er blevet til enkelte indhop og nogle enkelte scoringer. Club La Santami Lanzarotemiittumi sapaatip akunnera ataaseq sungiusaqqammerpugut, neriuppungalu nunanut allanut unammisartut taamatut ittumi ullut ilaanni sungiusarnissamut periarfissaqalerumaartut.

Nykøbing Falster Håndbold aamma Odense Håndbold nunarsuarmi europmiluunniit pissartanngorniuttoqarneanut atatillugu unammisoqatannginnerani ukiut tamaasa Club La Santami sungiusaqatigiittarput.

Saniatigut sulisartoq

Lykke Frank Hansen assammik arsartarnermi saniatigut ikaartaatileqatigiiffiup Scandlinesip allaffiani nalunaaquttap akunnerini 20-ni sulisarpoq. Scandlines Nykøbing Falster Håndboldimut aningaasatigut tapiissuteqartartut ilagaat.

- Danmarkimiiginnassaguma isertitaqartariaqarpunga.

Lyke Frank Hansenitut sungiusarlunilu sulisaraanni soorunami piffissaalatsiuartoqartarpoq.

- Suut tamarmik pilersaarusiugaareertuaannarput. Sungiusassaagut, unammissaagut, sulissaanga, sungiusartarnivullu eqqarsaatigalugit aamma qasuersartartussaavunga, soorunami aamma inuuninnutnaapertuuttumik nerisassiornissaq.

- Nuummi igaffinga maqaasivara, Lykke Frank Hansen oqaloqatigiinnitsinni oqariasaarpoq nassuerutigalugulu Nuummut angerlarsilertarluni.

- Aamma ilaquttakka maani Danmarkimiittut Kalaallillu Nunaanniittut piffissaqarfiginiarnerat ajornakusoortarpoq.

- Qujanartumik aappara ilagaara, taamaammat ajornavianngilaq.

Nunanut allanut unammisartut

Lykke Frank Hansenip qularutiginngilaa, Danmarkimi assammik arsartartuunermini arsallaqqinnerulissalluni.

- Qasujaallisartarnikkut maluginisinnaavara nukittunerulersimallunga. Aallarteqqaarama qasujaallisartarnikkut kinguussaqqaalunga takusinnaavara. Maanna ajunnginnerulerpoq, aamma nunanut allanut unammisartoqatimma naapeqqinnissaat qilanaaraara, Lykke Frank Hansen naggasiivoq.

Nunanut allanut unammisartoq februaarip qaammataani Nuummi katersuutissapput.