Lykke Frank Hansen unammiartaqattaarluni angalasoq
Assammik arsartartutut nunatsinnit nunanut allanut unammiartartoq Lykke Frank Hansen sapaatit akunneri marluk kingulliit unammingaatsiarsimavoq, tassa qasuersaarfeqarpiarani arfinileriarluni unammersuartarsimagami. Unammisartup taamaattoqarnera ajorinngivippaa.
Arnat assammik arsarlutik nunanut allanut unammiartartut Chicagomi nunarsuaq tamakkerlugu pissartanngorniunnissamut anngunniukkamik sølvinnapput. Lykke Frank Hansen unammilluarnerpaat ilaattut All Star-itut taaneqarpoq, venstre backitut inissisimasussatut.
- Aappassaat All Star-iniippunga. Suli ugguarpunga Puerto Ricomut finalimi ajorsarujussuaratta, taamaasillutalu VM-imut Spaniami decemberimi ingerlanneqartussami peqataasussaajunnaarluta. Nukillaarluinnarsimavugummi. Ullut arlallit unammillerneqangaatsiareerluta finalimi unammivugut. Danmarkimi sungiusaqatigeeqqaarsimavugut, taava angalarujussuarpugut unammiarluta. Ullut pingasut ingerlanerini pingasoriarluta unammivugut, ullullu sisamassaanni finalimi unammilluta. Soorunami ilungersunarpoq, Lykke Frank Hansen oqarpoq.
Kalaallit Nunaat Puerto Ricomut unammigami 34-24-mik ajorsarpoq.
Ingerlaqqittuaannartoq
Unamminerit naammassimmata aqagukkut Chicagomiit Amsterdam aqqusaarlugu Københavnimut angalavoq. Katillugit 7400 kilometerit. Lykke Frank Hansen unammisartoqatinilu Københavnumut tallimanngornermi ullaap tungaani tikipput.
Nykøbing Falster Håndboldklubbimi unammisartoqataa svenskeq Johanna Westberg mittarfiup silataani utaqqivoq. Slagelsemut ingerlaarput. NFH-p bussiinut ikillutik, ingerlaannarlu Aalborgimut unammiarlutik EH Aalborg unammissallugu.
NFH unamminermi 36-28-raarluni ajugaavoq. Akunnerpassuarni timmisartornerit, biilernerit bussinullu ilaasimanerit Lykke Frank Hansenimut sunniuteqarsimanersut takuneqarsinnaanngilaq. Unamminermi sisamariarluni isertitsivoq.
- Soorunami assoroornaqaaq. Timmisartumi sinippunga. Aalborgimut bussernitsinni aamma sinippunga. Qujanartumik iluatsippoq, Lykke Frank Hansen oqaluttuarpoq.
Immikkuullarilluinnartoq
- Nalinginnaasumik taama iliorneq ajorpugut, NHF-imi sungiusaasoq Jakob Larsen Sermitsiaq.AG-mut oqarpoq.
- Lykke qasuersaarnissaanik piffissaleraluarpara. Unammisartoqataali ajoquserpoq, taamaammat Lykke sianerfigaara aperalugu unammeqataarusunnersoq.
- Unammeqataajumavoq. Iluatsipporlu. Timikkut tarnikkullu nukittulluinnarnissaq tassani pisariaqarluinnarpoq, pingaartumik angalarujussuareerluni taama qaffasitsigisumi unamminiaraanni.
- Isumaqarpunga Kalaallit Nunaanni pinngortitami angalasarluni peroriartorsimagaanni tamanna nukittuunngussutaasartoq, Jakob Larsen oqarpoq qungujullunilu.
Utereerpoq aallarteqqereerlunilu
NFH marlunngormat unammeqqippoq. Skanderborg Håndbold unammineqarput. NFH ajorsanngujoortutut isikkoqaraluarput, unamminerulli naammassilernerani 31-29-mut siuarput ajugaallutillu.
Lykke Frank Hansenimut sapaatip akunnerata ataatsip ingerlanerani unamminerit arfinilissaraat.
Assammik arsartartup Nykøbing Falsterimut tikinnerminit ullut pingasut akunnernik 12-nik sivisussuseqartumik aamma sulisarsimavoq, oqaluttuarli taanna allaavoq.