Ludvigsen ilaqutariinnut atugassarititaasunik siuarsaaniartoq

Asii Chemnitz Narup Kommuneqarfik Sermersuumi borgmesteritut tassanngaannaq tunuarmat Charlotte Ludvigsen partiip iluani Uju Petersen unammillertigalugu borgmesterinngorniuttoqareersorlu borgmesterinngortinneqarpoq.

Apriililli 6-ani qinersisartut aalajangissavaat, nunatsinni borgmesteriuffiit nuimanersaanni kina issiasuussanersoq.

Isinik uisitsisoq

- Ukiuni marlungajanni borgmesterioreerlunga suliffiup qanoq pissanganartiginera borgmesterillu innuttaasunut tamanut allanngornernik pitsaasunik pilersitsinissamut qanoq annertutigisumik periarfissaqarnera tappiffigilersimavara, Charlotte Ludvigsen Sermitsiaq.AG-mut oqarpoq, naliminilu atuarfimmik nutaamik, ulluunerani paaqqinnittarfinnik nutaanik marlunni angerlarsimaffeqanngitsullu najugaqarfissaannik sanaartornissamik aalajangiisoqarsimanera tikkuarlugu.

- Aamma timersortarfissaq nutaaq, majuartaat nutaaq inuusuttunullu sukisaarsartarfik nutaaq pillugit aalajangiisimavugut, aalajangiunneqarsimasunik taaguivoq.

Qineqqusaarnissaq pineqartillugu Kommuneqarfik Sermersuup ”meeraqarfigissallugu ilaqutariiuffigissallugulu nunarsuarmi pitsaanerpaanissaa” suliniutigerusuppaa.

- Pitsaasunik atuarfeqarlutalu ulluunerani paaqqinnittarfeqassaagu aamma meeqqanut inersimasunullu sunngiffimmi sammisassaqartitsinikkut pitsaasunik neqerooruteqassaagut, kikkunnullu tamanut pitsaasunik ineqartitsissalluta. Aningaasartuutissanut missingersuutit pillugiit isumaqatigiissutitsinni ukiuni tulliuttuni arfinilinni pisortat inissiaataannik 1850-inik sanaartortoqarnissaa siunniussimavarput. Kisitsit taanna aalajangiussimavarput, kommunitsinni ullumikkut initaarniarlutik utaqqisut allattorsimaffianniittut amerlassusaannut naapertuummat. Kikkulluunniit pitsaasumik ineqarsinnaatitaalernissaat sukataarutiginiarpara, oqarpoq.

Inuussutissarsiornermi siuariartorneq

Taamatuttaaq inuussutissarsiornermi siuariartortuarnissap qulakkeernissaa pingaartippaa, ”akileraarutitigut isertitat pisariaqartikkatsigit”, oqarneratut.

- Kiisalu siuariartornerup misigisatta tamanut iluaqutaanissaanut qularnaveeqqusiisorusuppunga. Kommuneqarfik Sermersooq ingerlalluarpoq. Kikkut tamarmik siuariartornermit pissarseqataanissaat pingaaruteqarpoq. Taamaammat sapinngisamik amerlasuut sulilernissaat, aamma kommunimi innuttaasunut tamanut periarfissanik tunniussaqarnissarput, pingaartipparput, nassuiaavoq.

Borgmesteri IA-meersoq oqarpoq, borgmesteritut atorfik ”inuttut namminissarsiorluni anguniagaanngitsoq, kisiannili ataatsimooqatigiiffimmik pitsaasumik pilersitsinissamik suliniuteqarnerusoq”.

Naalakkersuisunik suleqateqarneq Naalakkersuisunillu tapersersorneqarneq pillugu ima oqarpoq:

- Assigiinngisitaalaarput. Martha Abelsenimik suleqateqarnermi meeqqanut isumaginninnermullu tunngasuni pitsaasunik suliniuteqartoqarsimavoq. Kisianni ineqarnermut tunngasuni suliaq Namminersorlutik Oqartussanut ukiumi kingullermi initoorujussuusimavoq, tamannalu kipiluttunarpoq. Pingaarnertut isigalugu, innuttatsinnut pissutsinik pitsaanerusunik qanoq ililluta pilersitsisinnaanerput pillugu oqaloqatigiinnermut ilaalersinnaanerput amigaatigaara, oqarpoq.

Naalakkersuisunit anguniakkanik amigaateqartoq

Siumumi eqqissisimasoqarnerulernissaa neriuutigaa, tamannalu oqartussat partiillu akimorlugit suleqatigiinnermik peqataatitsinerusumik kinguneqassasoq.

- Nalinginnaasumik neriuutigaara, Naalakkersuisut nunamut sammivimmik pilersitsissasut. Pingaarnertut Namminersorlutik Oqartussat tungaannit anguniakkat takorluukkallu angisuut amigaatigisimavakka. Assersuutigalugu paasisinnaanngilara, silap pissusianut tunngasuni nunatut maligassiuisuunnginnerput, uaguugattami silap pissusiata allanngoriartorneranik annerpaamik malugisaqartut, Charlotte Ludvigsen oqarpoq, qaammatinilu aggersuni suliffeqarfinni, utoqqaat angerlarsimaffiini, ilinniarnertuunngorniarfinni aqqusinermilu innuttaasunik naapitsiartortarnissani oqaatigalugu.

Kommunalbestyrelsi

Ullumikkut kommunalbestyrelsi 19-inik ilaasortaqartoq ima katitigaavoq:

Inuit Ataqatigit:

• Charlotte Ludvigsen
• Uju Petersen
• Harald Bianco
• Charlotte Pike
• Inge Olsvig Brandt
• Knud Mathiassen
• Henrik Rachlev
• Lone Rosengreen Pedersen
• Storm Ludvigsen

Demokraatit:

• Justus Hansen
• Nadia Olsen

Siumut:

• Peter Davidsen
• Mala Høy Kuko
• Ane Egede Mathæussen
• Thiiooq Knudsen
• Rolf Pike
• Laura Taunâjik Uitsatikitseq
• Jens Kristian Berthelsen

Suleqatigiissitsisut:

• Michael Rosing

SULIAQ TAMAAT ATUARUK: