LSD Nuummi nassaarineqartoq
Kalaallit Nunaata Politiivi angajoqqaat perorsaasullu kaammattorpaat meeqqat inuusuttullu oqaloqatigissagaat. Inuusuttut ataasiakkaat LSD-mik pereernermik kingorna tarnikkut perululersimallutik (psykoserlutik) napparsimavimmut unissimapput.
LSD-t nipitittakkatut ilusillit Kalaallit Nunannut eqqunneqarsimaneri politiinit ilisimaneqalerpoq. Kalaallit Nunaata Politiivi tusagassiutinut taama nalunaaruteqarput.
Politiit angajoqqaanut perorsaasunullu kaammattuipput LSD-p aanngajaarniutillu allat ulorianassusaat pillugu meeqqat inuusuttullu oqaaqqissaarneqassasut.
Kalaallit Nunaata Politiivi ilisimatitsipput inuusuttut ataasiakkaat LSD-mik pereernermik kingorna tarnikkut perulullutik (psykose, aaqq.) Dronning Ingridip Napparsimavissuanut Nuummiittumut unitsinneqartariaqalersimasut.
Politiit paasisatik naapertorlugit nalilersinnaanngilaat Kalaallit Nunaanni LSD atugaangaatsiartoq, illuatungaanili itigartivissinnaanagu inuusuttut arlaqartut LSD-mik misiliiniarsinnaanerat atuisinnaaneralluunniit, allassimavoq.
LSD psykosertitsilersarpoq
- Piffissami qaninnermi takuarput inuusuttut ataasiakkaat LSD-mik pereernermik kingorna psykoselertut, ikiorneqarsinnaaniassagamillu napparsimavimmut allaat unitsinneqartariaqalersimallutik. LSD-mik pisarneq inuunermik ulorianartorsiortitsilersinnaavoq, vicepolitiinspektør Viggo Johansen oqarpoq.
- Aanngajaarniutitornerup ulorianassusaa pillugu angajoqqaat perorsaasullu meeqqaminnut oqaaqqissaarinissaannik kaammattorpagut, oqarpoq.
Viggo Johansenip ilanngullugu erseqqissarpaa aanngajaarniutinik nunamut eqqussuineq, tigummisaqarneq niuerutiginninnerlu inatsisinik unioqqutitsinerusoq.
Kalaallit Nunaata Politiivisa ilisimatitsissutigaat LSD nipitittakkatut amitsigisut pineqarsinnaasut, taamaammallu pappiaqqatut kipparissutut iluseqartartut, qalipaatigissuusarlutik ilutsinilluunniit allanik assiliartaqarsinnaallutik. Angajoqqaat tamassumunnga eqqummaareqqullugit politiit kaammattuipput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...