Look North kalaallinut influencerimik atuisartunut pilerisaarilersoq
Kalaallit Nunaanni suliffeqarfiit marluk kattullutik, kalaallit nunanilu allaneersut inuit attaveqaqatigiittarfiinik atuisartut nittarsaassinermik neqeroorfigisalerniarpaat.
Kalaallit Nunaanni suliffeqarfiit marluk, Malugiuk aamma Happy Greenland, kattullutik Kalaallit Nunaanni suliffeqarfiit siullersaattut influencerit aqqutigalugit pilerisaarisarneq aallartisarpaat.
Suliffeqarfiup nutaap taaguutigilerpaa Look North, influencerillu suleqatigalugit inuit attaveqaqatigiittarfiisigut nittarsaassisarniarluni.
- Look North Kalaallit Nunaanni pilerisaareriaatsimik maannamut takuneqariinngitsumik
periarfissiivoq, pilerisaareriaaseq nunarsuarmi atugaallualereersoq, sulifffeqarfimmit nutaamit allapput.
Influenceri inummut ilisimaneqartumut attaveqaatini atorlugu inuit attaveqaqatigiittarfiisigut nittarsaassisarlunilu sunniuteqartartumut taaguutaavoq. Tamanna amerlasuutigut akileeqqaarluni pisarpoq. Influencerit tunisassiatik, suliatik oqariartuutisatilluunniit aalajangersimasut nittarsaassinnaavaat.
- Influencerit aqqutigalugit pilerisaarineq Kalaallit Nunaanni nutaajuvoq, nunatsinnilu
pitsaanerusumik oqaaseqaatigerusutat apuunnissaannut, pilerisaarinissamut
malunnarsaarinissamullu periarfissagissaaqaluni, Look North-imi pilersitseqataasoq
Mona Torp tusagassiorfitsigut nalunaaruteqarnermi oqarpoq.
INFLUENCER MARKETING KALAALLIT NUNAANNI
Kalaallit Nunaanni innuttaasut pingajorarterutaat inuit attaveqaqatigiittarfiannik Facbookimik atuisarput, inuillu attaveqaqatigiittarfii allat, soorlu Instagram influencerinit amerliartortunit aamma atorneqartarput.
Look Northimit isumaqarput, inuit attaveqaqatigiittarfii nittarsaassinermi atorluarneqarsinnaasut, tassa inuit attaveqaqatigiittarfiisigut attaveqaqatigiissinnaaneq ajornanngitsunnguummat.
- Influencerit nunatsinneersut aqqutigalugit pilerisaarisinnaaneq neqeroorutigaarput.
Sullitasi angorusutasilu kiinamik ilisarnartumik takunnisinnaapput, nunarsuarisaata
assinganik nunarsuaqartuusut, Aviaq Brandt pilersitseqataasoq oqarpoq.
Look Northimit Nunatsinni influncerit amerlanerulersinneqarnissaat sulissutigineqarniarpoq, inuillu attaveqaqatigiittarfiisigut nittarsaassisarneq pitsanngorsaaffiginiarlugu - tassa Nunatsinni inuinnaat pisortallu suliffeqarfiutaat eqqarsaatigalugit.