London Mining piiaanissamut akuersissumminik arsaagaasoq
Naalakkersuisut aalajangersimapput, Isukasiani aatsitassarsiorniarnerup ingeriartortinneqannginnera pissutigalugu London Miningip piffissamut killigititamik sivitsueqqittoqarnissaanik qinnuteqaataa itigartinniarlugu. Taamaammat ingerlatseqatigiiffiup piiaanissamut akuersissunni utertittussanngorpaa.
London Miningip Kitaaniittumi Isukasiani piiaanissamut akuersissutini utertissavaa.
Utertitsinermut ilaatillugu pisinnaatitsissummik pigisaqartoq:
- Nunap sannaa pillugu paasissutissat nalunaarsukkat il.il. tamaasa Aatsitassanut oqartussamut nassiuttussaavai
- Qularnaveeqqusiinermut kontumut sinneruttut 1,5 mio. koruunit akilertussaavai
- Sumiiffimmi akuersissuteqarfiusumi inaarutaasumik saliisussaavoq
Pissarsiffik: Naalakkersuisut
Ingerltaseqatigiiffik pingasoriarluni piffissamut killigititamut sivitsuiffigineqarsimavoq, ingerlatseqatigiiffiulli sisamassaannik qinnuteqarneranut atatillugu Naalakkersuisut itigartitsisimapput.
Ilaatigut ingerlatseqatigiiffiup arlaleriarluni nukingisaarneqaraluarluni qularnaveeqqusiinermut kontumut aningaasanik naammattunik akiliisarsimannginnera tunngavigalugu itigartitsisoqarpoq.
Sivitsuinissamik qinnutaatip itigartinneqarneratigut, piiaanissamut akuersissummi maannakkut killigititat atuutiinnarnerat, piffissamut killigititap sivitsorneqannginnerata sunniutigisussaavaa. Piffissamut killigititat taakkua 2020-mi ukiup affaani kingullermi naammata London Miningip saviminissamik piiaanissamut akuersissutini utertittussanngorpaa.
Akiliisimanngitsoq
Naalakkersuisut nalunaarutigaat, suliassami maannamut piiaanissamut matusinissamullu pilersaarummut tunngatillugu siumut ingerlasoqannginnera kiisalu pisinnaatitsissummik pigisaqartup qularnaveeqqusiinermut kontumut akiliisimannginnera tunngavigalugu itigartitsinissaq pillugu aalajangiisoqartoq.
Qularnaveeqqusiinermi saliinissamut naammattunik aningaasassaqarnissaq qulakkeerneqartussaavoq.
Piffissamut killigititanut taakkununnga siunertaavoq suliassap siumut ingerlanissaata qulakkeernissaa. Taamaaliornermi ingerlatseqatigiiffiup pissusiviusuni
aatsitassarsiornermi ingerlatanik suliaqarani, aatsitassarsiorfissami patsisissarsiorluni, allanik soqutiginnissinnaasunik sumiiffimmut mattusimanninnissaa pinngitsoorneqartussaavoq.
Ulloq 23. oktober 2013 Kalaallit Nunaata kitaani Isukasiani sumiiffimmi piiaanissamut akuersissut Naalakkersuisut tunniuppaat, ingerlatseqatigiiffilulu Kalaallit Nunaanni allanik piiaanissamut akuersissummik tunineqarnissaq soqutigisarinngilaa.