Løkkep TV2-mi allaaserisamut assortuussutaasumut aaqqissuisuusimasoq atorfinitsippaa

1. juni aallarnerfigalugu tusagassiortoq aamma politikkikkut siunnersortaasimasoq Ulla Østergaard Moderaternemi attaveqaqatigiinnermut pisortanngussaaq.

Løkkep Ulla Østergaardimik atorfinitsitsinera politikkikkut naleqqutinngitsumik takutitsinerusoq, Aaja Chemnitz isumaqarpoq.

Danskit nunanut allanut tunngasunut ministeriata Lars Løkke Rasmussenip partiiata, Moderaterne, Ulla Østergaard partiimi attaveqaqatigiinnermut pisortatut atorfinitsimmagu, Aaja Chemnizip tupiguusuutigaa.

Chemnitz danskit tusagassiorfiannut B.T-mut taama oqarpoq.

Taamatut atorfinitsitsineq, taassuma oqarnera naapertorlugu Kalaallit Nunaanni iluarineqanngitsoq, taanna isumaqarpoq.

Nunatsinni qinersisoqarneranut atatillugu nutaarsiassap eqqunngitsup saqqummiunnearneranut atatillugu, Ulla Østergaardip TV2-mi aaqqissuisuunertut atorfimmit 2021-mi tunuarpoq.

- Takutitsineq politikkikkut uggornartorujussuuvoq. Danmarkip Kalaallit Nunaatalu akornanni paaseqatigiinneq paasineqartariaqarpoq.

- Ajornakusoortuuvoq, eqqarsarluarnanilu aalajangiinernit suli ajornakusoornerulersitsivoq, uanilu taamatut pisoqarpoq, Chemnitz B.T.-mut taama oqarpoq.

Løkkemut utertoq

Ulla Østergaard siornatigut Løkkemut 2001-imi nunamut namminermut peqqissutsimullu ministerinngormat immikkut siunnersortitut atorfeqarsimavoq. Løkke taamanikkut Venstremut ilaavoq.

Eqqunngitsumik nutaarsiassiisoqarnerata kingorna TV2-mit tunuarpoq, aallakaatitsivimmi sulisut pingasut oqaluttuamik allaaserinninnissamut Østergaardimit kimigiiserfigineqartutut misigisaqarsimapput.

Tamanna TV2-mi sulisunut mailikkut allagaqarnermi, Ekstra Bladetimit issuarneqartumi atuarneqarsinnaavoq.

Allaaserisaq Nunatsinni qinersisoqarnissaanut ullut arlaqanngitsut qaangiuppata qinersisoqartussaasoq saqqummiunneqarpoq, tassani politikeri Múte B. Egede suliani marlunni attuumassuteqarpallaarsimasoq allassimavoq, aningaasatigullu iluanaarfigisimagaa. Tamanna eqqunngilaq. Tamatuma kingorna TV-p allaaserisaq peerpaa.

Nunanut allanut tunngasunut ministerip partiiata Ulla Østergaard Kalaallit Nunaannut tunngatillugu misissorluarsimanngimmagu, Chemnitzip ”kusanaatsuunerarlugulu silatusaartuunnginnerarpaa”.

Isornartorsiuineq akerlilerpaa

Moderaternemi partiip allattaata, Kirsten Munch Andersenip isornartorsiuineq akerlilerpaa.

- Ulla Østergaard Moderaternemi attaveqaqatigiinnermut pisortatut atorfinitsippara, tamannalu inuunermi sivisuumik sulisimanermit piginnaasat tunuliaqutigalugit pivoq.

- Ulla Østergaard ukiut marluk matuma siorna TV2-p Kalaallit Nunaanni qinersisoqarneranik nutaarsiassaqartitsinermut pisortaavoq, tassanilu ilungersunarluinnartumik kukkusoqarpoq. Akisussaaffik tamakkiisoq tiguaa, ersarissumillu utoqqatserpoq, Kirsten Munch Andersen B.T.-mut mailikkut allappoq.

Múte B. Egede Naalakkersuisuni maanna siulittaasup Løkkemut isornartorsiuinerata kingorna, taama oqariartuuteqartoqarpoq.

Danmarkimi naalakkersuisut nutaat atulermata, Kalaallit Nunaata Danmarkillu akornanni attaveqatigiinneq pitsaanerusumit ajornerusumut inissippoq, Múte B. Egede Politikenimut taama oqarnikuuvoq.

Attaveqatigiinneq ilungersunareersoq

Pingaartumik Løkke isornartorsiorpaa, pitsaasumik suleqatigiinnissamut taanna aporfilersuinerarlugu.

Múte B. Egedep ilaatigut Afrika Kujallermut maanna aallartitap, Tobias Elling Rehfeldip, Issittumi aallartitatut nutaatut toqqarneqarnera ilaatigut oqaatigaa.

Nunanut allanut tunngasunut ministereqarfik immikkut inuiaassuseq malillugu aallartitanik toqqaaneq ajortoq, Lars Løkke Rasmussen siornatigut oqarnikuuvoq. Toqqaanerli Kalaallit Nunaannut tinnersaanerunera, Múte B. Egedep attappaa.

- Nunanut allanut tunngasunut ministereqarfiup qanoq uagutsinnut isiginninneranik periuseq takutitsivoq, uagullu kunngeqarfimmi Issittumi nunataagaluarluta peqataatinneqanngilagut. Ersarippoq, Savalimmiut Kalaallit Nunaallu pillugit aalajangiinerit Savalimmiut Kalaallit Nunaallu avaqqullugit pisannginnissaannik Danmarkip paaseqatigineqarneranut innersuussilluni taanna oqarpoq.

Powered by Labrador CMS