Løkkemut isumaqatigiissut pillugu Partii Naleraq paasisaqarnerorusuttoq

Namminersorlutik Oqartussat Air Greenlandip piginneqatigiissutaannik pisinissaat Demokraatit akerleraat. Taamaammat Lars Løkke Rasmussenip Kim Kielsenillu mittarfiit pillugit isumaqatigiissutaanni piginneqatiginninnermut tunngasoq akuerisinnaanngilaat.

- Nuannaarutigaara isumaqatigiissut pillugu isornartorsiuinera Demokraatit siulittaasuata ilalermagu, qineqqusaarnermimi Air Greenlandip piginneqatigiissutaanik pisiniarneq akerlerereerakku. Imaanngitsoq nunap nammineq pigisaanik Namminersorlutik Oqartussat peqassanngitsut. Kisiannili aningaasarpassuit ajortumut igiinnarneqassanngimmata, Pele Broberg Sermitsiaq.ag-mut oqarpoq.

Air Greenlandip aningaasaliiffigineqarnerunissaa isumassarsiatsialaanngitsoq, Niels Thomsen aamma isumaqarpoq.

Isumaqatigiissut allanngortinneqarsinnaava?

Lars Løkke Rasmussenip Kim Kielsenillu atsioqatigiinneranni erseqqissarneqarpoq isumaqatigiissutigineqartoq Inatsisartuni Folketingimilu akuerineqaqqaassasoq. Tamanna Niels Thomsenimit aamma erseqqissarneqarpoq. Suli ersarluppoq isumaqatigiissutigineqartoq allanngortinneqarsinnaanersoq, imaluunniit akuerineqassanersoq – itigartitsissutigineqarluniluunniit, maannakkutut itsillugu.

Tamanna ersarissarumallugu, Pele Broberg (PN) §37 atorlugu apeqquteqarpoq.

- Isumaqatigiissut isumaqatiginninniutigeqqinneqassanngitsoq Naalakkersuisut Siulittaasuata siornatigut oqaatigereermagu, aammalu Naalakkersuisut Siulittaasuannit danskillu ministeriunerannit atsiorneqareermat, paaserusuppara isumaqatigiissutigineqartup imarisaa Inatsisartuni allanngortinneqarsinnaanersoq, siunnersuutimini tunngavilersuutimini taama allappoq.

Ilanngullugu tikkuarpaa Niels Thomsenip (D) isumaqatigiissutip allanngortinneqarnissaa kissaatigalugu nalunaarutigisimagaa – Kim Kielsenilli tamanna periarfissaanngitsutut naqissuseraa.

- Aalajangigassani taama annertutigisuni malittarisassat ersarissut pingaaruteqarluinnarput. Taama qitiulluinnartigisumi, soorlu isumaqatigiissummi, taama assigiinngitsigisunik oqariartortoqarnera tatiginnilersitsinngilaq. Minnerunngitsumik aningaasaqarnermut naalakkersuisumit naggataarutaasumik oqaaseqarnerminit nassuiaatigineqarmat, Air Greenlandimut piginneqatigiissutinik pisineq suliffeqarfimmut aningaasanik atorniarnermit aningaasalersorneqassasoq, Pele Broberg (PN) oqarpoq.

Naalakkersuisoqatigiit D-llu akornanni isumaqatigiissut

Demokraatit naalakkersuisoqatigiinnut tapersersuissallutik isumaqatigiissuteqarmata, mittarfiliortiternissamut isumaqatigiissummik atsioqatigiittoqarpoq.

- Naalakkersuisut Siulittaasuata Kim Kielsenip aamma Danmarkip ministeriunerata Lars Løkke Rasmussenip mittarfiliortiternissat pillugit aningaasalersornissaannut isumaqatigiissutaat, UKA2018-imi Inatsisartuni akuerineqarnissaat, isumaqatigiittut sulissutigissavaat, isumaqatigiissummi allassimavoq.

Air Greenlandip piginneqatigiissutaannik pisinissamik pinngitsoortitsinissamik, Niels Thomsen (D) attassinnaaqqullugu Pele Brobergip (PN) kajumissaarpaa.

- Niuernerluttuuneq inerteqqutaanngilaq, Nuulli Ilulissallu avataani najugaqartunut akiligassamik taama annertutigisumik nassiussinissamut killeqartariaqarpoq, soorlu Air Greenlandip piginneqatigiissutaannik kiffartuunneqartut akiligaannik aningaasaliiniarnikkut, Pele Broberg (PN) oqarpoq.

Sermitsiaq.AG-p Naalakkersuisut Siulittaasuat, Kim Kielsen (S) pisumi oqaaseqartinniarlugu sulissutigileruttorpaa.