Løkke Nunatsinni mittarfiit pillugit: Assaga isaappara

Danmarkimi naalakkersuisut Nunatsinni mittarfiit sanaartorneqartussat danskit aningaasaleeqataaffiginissaannut ammaassipput. Tamanna suliaq danskit naalakkersuisuisa malinnaaffigeqqinnaarpaat.

Mittarfiit sanaartorneqarnissaannut kinamiut sanaartugassanik suliarinnittartut suliffeqarfissuup suliarinnikkumaneranik tamanna pissuteqarpoq.

Statsminister Lars Løkke Rasmussen (V) Folketingsimi oqaluttarfimmit oqarpoq.

- Qarmaalluta silarsuarmut assiaqusersuisinnaanngilagut. Kisianni tamatuma saniatigut sianiilliussanngilagut. Nunanit allanit aningaasaliisoqartarnermi navianarsinnaasunut qisuariartariaqarpugut, taanna oqarpoq.

- Attaveqaqatigiinnermut (pitsaanerusumik, aaqq.) ineriartortitsinermik qanoq qulakkeerinninnissamut qaninnerusumik pisussaaffeqarnerusumillu oqaloqatigiinnissamut Danmark piareersimavoq.

- Uanga nammineq assammik isaassinertut isigaara, taakkulu oqaloqatigiinnerit aallartissappata, illuatungaanit tiguneqartariaqarput, taanna tallimanngornermi naalagaaffeqatigiinneq pillugu apeqquteqaat naapertorlugu oqallinnermi oqarpoq.

Mittarfinnik suliniutit danskit naalakkersuisuinit immikkut maluginiarneqarsimapput, tamanna Naalakkersuisunit nutaanit inatsisissatut siunnersuutini siulliulluni saqqummiunneqarpoq, suliniut aningaasaqarnermut pingaarutilittut isigineqarluni.

Tamanna kinamiut naalagaaffiannit sanaartugassanik suliarinnittartup suliffeqarfissuup China Communications Construction Companyp suliffeqarfinnik suliarinninnissamik neqerooruteqarsinnaatitaasut arfinillit ilaanniinneranik pissuteqarpoq.

Nunatsinni mittarfiit sanaartorneqarnissaannut kikkut suliarinninniarlutik neqerooruteqassanersut Danmarkip akuliuffigissanngikkaa, Naalakkersuisut siulittaasuata, Kim Kielsenip Siumumeersup, qineqqusaarnerup nalaani oqaatigaa.

Danskilli naalakkersuisui akuliussinnaatitaapput, namminersornermut inatsisip nunanut allanut aamma isumannaatsuunissamut politikkimut apeqqutinut tunngasunut Danmark pisinnaatimmagu.

Statsministerip tamanna erseqqissaatigaa, sanaartugassallu Kalaallit Nunaata tunisaasa ataatsimut nalingisa 20 procenterigaat oqaatigalugu.

- Mittarfinnut suliniutinut aningaasaliinerit taama annertutigisut soorunami apeqqutinik qaffakaatitsipput.

- Danmark Kalaallit Nunaannik peqatiginnittutut isigaara, aamma inuussutissarsiornikkut ineriartortitsinermut tunngatillugu, kisianni aamma Kalaallit Nunaata tungaanit suleqatiginnikkumassuseqarnermik piumasaqaatitaqarpoq, Løkke oqarpoq.