naalagaaffeqatigiinneq
Løkke: Nunanut allanut politikkikkut nammineerluni ingerlatsinissaminnik kissaateqarneq paasilluarsinnaavara
Nunatta nunanit allanit tusarneqarnissaa ministiteriunerup Lars Løkke Rasmussenip tapersersorpaa – inatsilli tunngaviusoq periarfissanik killilersuivoq.
Kalaallit Nunaata Savalimmiullu oqartussaaffinnik arlalinnik Danmarkimit tigusinissaminnik aammalu namminneerlutik nunanut allanut politikkikkut ingerlatsinissaminnik kissaateqarnerat ministeriunerup Lars Løkke Rasmussenip (V) paasilluarsinnaanerarpaa.
Ullumi Jyllands Postenimi saqqummertumi, aviisimi allaatigisami tamanna erserpoq.
- Savalimmiut Kalaallit Nunaatalu nunanut allanut politikkikkut nammineerlutik ingerlatsinissaminnik kissaateqarnerat paasilluarsinnaavara. Pingaartumik suliassaqarfinni nunat taakku marluusut soqutigisaasa naapiffigisaanni - soorlu aalisarnermut tunngatillugu. Isumaqarpunga tamanna kikkulluunniit paasilluarsinnaagaat, ministeriuneq taama allappoq.
Kalaallit Nunaat Savalimmiulli naalagaaffeqatigiinnermu ilaangallartillugit tamanna imaasiallaannaq anguneqarsinnaanngilaq. Inatsit tunngaviusup erseqqissaatigaa nunanut allanut sillimaniarnikkullu politikkikki naalagaaffiup pisussaaffigingaa.
- Danskit naalakkersuisuisa inatsit tunngaviusoq unioqqutissinnaanngilaat - aamma tamanna pitsaanerpaamik siunertaqaraluarpalluunniit, Lars Løkke Rasmussen (V) allappoq.
Tamannalu Kalaallit Nunaata nunanit allanit tusaaneqarniarneranik aporfiunngitsoq, taanna isumaqarpoq.
- Tamanna isumanqanngilaq, Savalimmiut Kalaallit Nunaatalu nunanut allanut oqariartuuteqarsinnaaneranik pisussaaffiiaaneq, nunanut allanut tunngassutilinnik aaqqissutissanik peqarpugut. Tamanna soorlu Issittumi Siunnersuisoqatigiinnut atuuppoq, tassani naalagaaffeqatigiit taakku pingasut naalakkerneqarsinnaanerat periarfissaalluni, aviisimi allaaserisami taama allaqqasoqarpoq.
Namminiilivinnissamik kissaateqarneq aviisimi allaaserisami Lars Løkke Rasmussen (V) aamma tikippaa.
- Savalimmiuni Kalaallit Nunaanniluunniit amerlanerussuteqartut namminiilivinnissamik aalajangissagaluarpata, danskit naalakkersuisuisa tamanna soorunami ataqqiumaarpaat, aammali ajuusaarutigalugu, ministeriuneq Lars Løkke Rasmussen (V) allappoq.