Løkke ajornartoorfimmi unittaammik qulakkeerivoq
Kalaallit Nunaata nammineerluni mittarfinnut suliniut nammineq aqussavaa; kisianni danskit naalakkersuisui Kalaallit Airports Internationalimi aktiaatiminnik illersuinissamik qulakkeeripput.
Danskit naalagaaffiata Kalaallit Airports Internationalimik piginneqataanera pillugu isumaqatigiissut oqimaaqatigiissillugit naligiissinneqarnissaannik tunngaveqartoq, danskit naalakkersuisui aamma Naalakkersuisut taama isumaqarput. Lars Løkke Rasmussenip aamma Kim Kielsenip ullumi isumaqatigiissutaanni tamanna atuarneqarsinnaavoq.
Naalakkersuisut amerlanerussuteqartunik piginneqataassuteqarlutik suliniummik ingerlatsisuunissaannik tamanna paasineqassaaq, kisianni danskit naalakkersuisui ajornartoornermi unittaammik qulakkeerinnippoq. Naak Lars Løkke Rasmussenip una Naalagaaffeqatigiinnermut aningaasaliissutitut isigigaluaraa, aningaasaliineq isertitataqarnikkut utertinneqartussaavoq.
- Kalaallit Nunaat aalajangiisuussaaq, Kalaallit Nunaat ineriartortinneqassaaq, kisianni uagut ikinnerussuteqartunik piginneqataassuteqartutut, arlaannik aningaasaliissutitta ulorianartorsiortinneqarneranik eqqarsarnartumik pisoqalerpat, iliuuseqarnissamut periarfissaq qulakkiissallugu soorunami akisussaaffeqarpunga, Lars Løkke Rasmussen Sermitsiaq.AG-mut oqarpoq.
- Ilannguppugut
Danskit naalagaaffiat mittarfinnut suliniummut 700 millionit koruuninik aningaasaliissuteqarpoq. Naalagaaffik aningaasarpassuarnik taakkuninnga Kalaallit Airports Internationalimi aktiat 33,3 procentit pisiarai, taanna Kalaallit Airportsip ataani suliffeqarfiuvoq, Nuummi aamma Ilulissani mittarfinnik sanaartortussaq ingerlatsisussarlu.
- Una Kalaallit Nunaata aningaasaliineratut isigissallugu uannut pingaaruteqarpoq. Kalaallit suliniutigaat, kalaallit attavqaqatigiinnerannut tunngavoq, kalaallit oqartussat tassani siuttuupput. Kisianni uagut ilannguppugut – malunnaatilimmillu piginneqataassuteqarluta, tamannalu danskit akileraaruterpassui akiliissutiginerannik tamanna isumaqarpoq. Taamaattumillu aningaasaliineq tamanna souurnami illersussavarput, Lars Løkke Rasmussen oqarpoq.
Danmarkip taakkunannga 700 millionit koruuninik piginnaatitaaffiit suut qulakkeersimanerai, illuatungeriit maanna oqaluttuarinianngilaat.
Danmark Kalaallit Airportsimit peersinneqarsinnaanngilaq
Immikkoortumili ataatsimi Lars Løkke Rasmussen saqqummiussaqarusuppoq. Tassa Nuummi Ilulissanilu mittarfinnik Danmark piginneqataajunnaarnissaanik Naalakkersuisut arlaanni isumaqalissagaluarpata.
- Kalaallinit danskit aningaasaliissutaat pisiariumaneqarnissaat kissaatigineqalerpat, taama soorunami isumaqatiginninniutigissavarput.
- Tassami danskit akileraarutaat qularnartumut akiliutigeriarlugit pitsaasumik ingerlasoqalerpat anisiinnarneqarsinnaassanngilagut.