Løkke aamma Høegh-Dam naggueqatigiit inuit nalunaarsuiviat pillugu oqallittut
Naggueqatigiit inuit pillugit nalunaarsuiffeqalernissaanut siunnersuummut Lars Løkke Rasmussen nangaassuteqarpoq, taanna Folketingimi oqallittoqarnerani Aki-Matilda Høegh-Damimut taama oqarpoq.
Danmarkimi nunanut allanut tunngasunut ministeri, Lars Løkke Rasmussen (M), Kalaallit Nunaanni inuit nalunaarsuiffiannik pilersitsisoqarnissaanut nangaassuteqarluni oqarmat, naggueqatigiit inuit nalunaarsuiffimmik taagorneqartoq pillugu oqallinneq uani sapaatip akunnerani Folketingimut annguppoq.
Folketingimut ilaasortamut Aki-Matilda Høegh-Damip (S) apeqqutaanut akissummini taama oqaaseqarpoq. Inuit nunap inoqqaavisut pisinnaatitaaffii qanoq nukittorsarneqarsinnaanersut, nunanut allanut tunngasunut ministerip isumaa pillugu apeqquteqarpoq:
- Tassami maannamut nunanut allanut tunngasunut ministerimit, kalaallit inuit nunap inoqqaavinik imaluunniit issittormiunik nunap inoqqaavinik peqarneranik ersarissumik akuersaarneqanngillat, Aki-Matilda Høegh-Dam taama apeqquteqarpoq.
Løkke: Kalaallit innuttaasut tassaapput inuit aamma allat
Inuit nunap inoqqaaviusut, Lars Løkke Rasmussenip akuersaarluinnarlugu oqaatigaa. Nammineq isiginninnini naapertorlugu kalaallit innuttaasut 'nunap inoqqaartaqarlutillu aamma allanik kalaallisut imminnut taasinnaasunik peqartoq oqaatigaa.
Tassunga atatillugu nunanut allanut tunngasunut ministerip inuit nalunaarsuiffiannik pilersitsinissamut ernumassuteqarnini oqaatigaa:
- Assersuutigalugu inuit nalunaarsorneqarfissaat pillugu siunnersuummik aamma immikkut inuiaassuseq innuttaasunik nalunaarsuinermut aallaavigineqarnissaanik eqqarsaatit tusaallugit, taava uanni nangaassuteqarnermik pilersoqartarpoq, tassami aamma inuit pisinnaatitaaffii tunngaviusut aamma alapernaarsorneqartussaammata, ilaa, Lars Løkke Rasmussen oqarpoq.
Høegh-Dam: Nalunaarsuiffeqassanngila?
Nalunaarsuiffik pillugu Løkkep oqaaseqarnerani, inuit inuttut taasinnaanissaannik aamma inuttut nalunaarsorsimanissamik pisinnaatitaaffeqanngitsutut nunanut allanut ministerip oqarnera naapertorlugu paasineqassanersoq, Aki-Matilda Høegh-Damip apeqqutigaa.
Inuit imminnut nunap inoqqaavisut nassuiarsinnaanerat ajornartorsiutaanngitsoq, Lars Løkke Rasmussenip akivaa, kisianni 'imminut immikkut ittunik pisinnaatitaaffilersornissamut' atorneqalissappat ajornartorsiuteqalissasoq oqaatigaa.
- Tamat oqartussaanerisa sinaakkutit iluanni nunap inoqqaavinut ilaasutut, inuiaqatigiinni pineqartuni inuit pisinnaatitaaffeqarfiusumi akerlianik ilanngussisoqassappat ajornartorsiutaasinnaavoq, tassa imminut immikkut ittunik periarfissalersorluni imaluunniit allanik killilersuilluni, ilaa?
Apeqquteqarniartoq
Inuit nalunaarsorneqartarfiannik atuutilersitsisoqassanersoq, Kalaallit Nunaanni nammineq oqallisigineqarnissaa aalajangerneqassasoq, nunanut allanut tunngasunut ministeri nangilluni oqarpoq, kisianni danskit naalakkersuisuisa inernera nakkutigissagaat oqaatigaa:
- Ima ajornartorsiutinik imaqartunik inerniliussisoqassappat, taava soorunami oqaatigalugillu apeqqusersuissaagut, Lars Løkke Rasmussen oqarpoq.
Inuit nalunaarsorneqartarnissaannik siunnersuut Naleqqap siulittaasuani Pele Brobergimit saqqummiunneqarpoq, nalunaarsuiffik Inatsisartunut qinersinerni aamma siunissami naalagaaffinngornissaq pillugu taasititsinermi atorneqarsinnaassasoq, taassuma ilaatigut oqaatigaa. Siunnersuut ukiaanerani ataatsimiinnermi oqallisigineqarpoq, upernaakkullu ataatsimiinnermi suliarineqaqqinnginnerani Inatsisit pillugit Ataatsimiititaliami suliarineqarluni.