naalagaaffeqatigiinneq
Løkke: Savalimmiut Kalaallillu Nunaata qilersorsimanngitsumik inatsisit tunngaviusut sulissutigisinnaavaat
Danmarkip, Savalimmiut Kalaallillu Nunaata naalagaaffeqatigiittut ataatsimiinnerisa kingorna Løkke oqarpoq namminersulernissamik kissaatigisaqarneq ataqqigini
Kalaallit Nunaata Savalimmiullu namminneq toqqarsinnaavaat namminneq tunngaviusunik inatsisissaminnik sulerusunnerlutik, tallimanngormat naalagaaffeqatigiit Kalaallit Nunaanni ataatsimiinnerisa kingorna ministeriuneq Lars Løkke Rasmussen (V) oqarpoq.
Lars Løkke Rasmussenip, lagmand Aksel V. Johannesenip Naalakkersuisullu siulittaasuata Kim Kielsenip ataatsimiinneranni pingaartumik sammineqarsimavoq Savalimmiut Kalaallillu Nunaat namminneq tunngaviusunik inatsiseqarlutillu namminneq aningaasaqassanersut.
Naalagaaffeqatigiinnerup nunat nukittunerulersippai, ministeriuneq Lars Løkke Rasmussen oqarpoq, taassumalu aamma nunat namminersulivinnissamik kissaateqarnerat ataqqivaa.
– Isumaqarpunga naalagaaffeqatigiinnerup nukittunerulersikkaatigut, tamannalu ullumi ataatsimiinnitsinni uppernarsivara. Tamanna peqatigalugu ataqqivara Savalimmiuni Kalaallillu Nunaanni kissaatigineqarmat namminneq tunngaviusumik inatsisissaminnik suliaqarusunnerat, ministeriuneq oqaaseqaammini oqarpoq nangillunilu:
– Nunat marluullutik qilersorsimanngitsumik taamaasiorsinnaapput. Inatsisinik tunngaviusunik sulinermut atatillugu apeqqutit saqqummersinnaasut pillugit naalakkersuisut Savalimmiunik Kalaallillu Nunaannik pitsaasumik oqaloqatiginninnissaminnut piareersimapput. Tamanna aamma naalakkersuisut tunngavianni takuneqarsinnaavoq, taanna oqarpoq.
Savalimmiut Kalaallillu Nunaat namminnerisaminnik tunngaviusunik inatsiseqalerusuppata taakkua qanoq annertutiginissaat killissaqarpoq. Naalagaaffeqatigiilluni naalagaaffittut namminersortutut tunngaviusunik inatsiseqartoqarsinnaanngilaq.
Pingaartumik Savalimmut inatsisinik tunngaviusunik sulinermini siuarsimalluarpoq. 2010-mi 2011-milu Savalimmiut tunngaviusumik inatsisissatut siunnersuummik saqqummiussivoq. Taakkuali Inatsisinik atortitsinermut ministereqarfimmit akuerineqanngillat.
Ministereqarfiup tunngavilersuutigaa siunnersuutit inatsisinut tunngaviusunut naapertuutinnginnerat.
Naalagaaffeqatigiit ataatsimiinneranni ministeriunerup nunatta Naalakkersuisui neqeroorfigai aningaasaqarnikkut aaqqissuusseqqinnermi ikiorniarlugit, Kalaallit Nunaata aningaasaqarnera qulakkeerniarlugu.
– Kalaallit Nunaat Savalimmiullu piffissaq ungasinnerulaartoq eqqarsaatigalugu aningaasaqarnikkut annertuunik unammilligassaqarput. Assersuutigalugu aatsitassarsiornermit isertitat nutaat kisimiillutik Kalaallit Nunaata unammilligassai qaangersinnaanngilaat.
– Taamaattumik Naalakkersuisut neqeroorfigisimavakka aaqqissuusseqqinnermi suliniutinilu allani siunnersorsinnaallutigit, aningaasarsiornikkut ineriartornermik atasinnaasumik qulakkeerinneqataasinnaasumik, Lars Løkke Rasmussen oqarpoq.