Liv Karlalu BankNordikimit legatinnapput

Ilinniartut marluk BankNordikip legatianik tunineqarput.

Ilinniartut marluk ilinniarnerminni aningaasaqarnikkut ikiorneqarput, BankNordikkimmi ilinniartunut legatinik 25.000 koruuninik aningaasartartunik ilinniartunut marlunnut tunniusseqqammerpoq. Liv Inuk Oldenburg Lynge aamma Karla Kreutzmann ilinniarnerup nalaani aningaasanik taperneqarput.

BankNordik tusagassiutinut nalunaarummini allappoq.

Liv Aalborg Universitetimi Development & International Relations-imi kandidatinngorniarluni ilinniartuuvoq, nunallu Issittumiittut immikkut sammisaralugit. Legati Danskit Ottawami aallartitaqarfianni suliffimmik misiliinermini atorniarpaa.

Karla peqqissaasunngorniarluni ilinniarpoq, inaarutaasumillu bache- lorinngorniummik allaaserinninnerminut atatillugu Danmarkimut misissuiartorluni praktikkeriartussaalluni. Karlap legatinnalluni aningaasannaani atorlugit meeqqani pingasut Danmarkimukaqataanissaannut bilitsisiniarpai.

Allannguerusuttut

- Legati atorlugu Kalaallit Nunaanni inuiaqatigiinnut tapeeqataallutalu pitsaaliueqataarusuppugut – immikkullu inuusuttut qaffasinnerusumik ilinniagaqarnissaannut kajumissaarusullugit. Tamatuma saniatigut BankNordik-legati aamma ilinniartunut ulluinnarni oqilisaatissatut takorloorparput, BankNordikimi privatkundedirektøri, René Sørensen tusagassiutinut nalunaarummi oqarpoq.

BankNordik ukiut tamaasa marloriarluni legatinik agguaassisarpoq, tullianilu ukialerpat agguaasseqqissalluni. BankNordik tusagassiutinut nalunaarummini ilisimatitsivoq legatimut qinnuteqarfissaq kingulleq tassaasoq septembarip 24-at.

Powered by Labrador CMS