Skip to main content

Lethip Islandimi tusagassiorfiit peqquserlussimanermik pasilliutaat itigartikkaa

Islandimi tusagassiorfiit arlallit tamanut paasissutissiissutigisimavaat, taakku Polar Seafoodimi siulersuisut siulittaasuat Henrik Leth Kalaallit Nunaanni qanoq avaleraasartoortassanik pissarsisoqarsinnaanersoq siunnersuisarsimanerarpaat. Lethip akerlianik oqaluttuaraa allat qanoq pututitsiniaasimanersut.

E-mailip WikiLeaks aqqutigalugu saqqummiunneqartup Polar Seafoodip siulersuisuini siulittaasoq Henrik Leth Islandip aviisiini qulequtaritilersimavaa. Taakkunani Henrik Leth Islandimi aalisariutileqatigiiffik Síldarvinnslan peqatigalugu, Tasiilami aalisakkeriviliorniartuusaarluni qanoq avaleraasartoortassanik pissarsisoqarsinnaanersoq sinnersuisimanerangaavoq.

Henrik Lethip passilliutigineqartut nammineerluni itigartippai, oqarlunilu akerlerluinnaanik pisoqarsimasoq.

- Tamanna ilumuunngilluinnarpoq, allanuku aalisakkeriviliorsinnaallutik oqartut, Leth Sermitsiaq.AG-mut oqarpoq.

Pineqartoq Islandimi aalisakkeriviit annertuumik peqquserluuteqarsimanerinut ilaatineqarpoq, tassa sapaatip akunnerata siuliani WikiLeaksip uppernarsaatinik 30.000-inik saqqummiussineratigut takutinneqartunut ilaavoq. Islandimi tusagassiorfiit arlallit malillugit, ingerlatseqatigiiffik Samherji Namibiami annertuumik peqquserlussimasunut ilaavoq, ingerlatseqatigiiffik aalisagartassiissutinik piniarluni akiliilluni peqquserlussimavoq.

Mail isertuussaq kalerriutigineqarsimasoq

Tassunga atatillugu Síldarvinnslanimit Samherjimut maileq saqqummiunneqarsimavoq, tassani Henrik Lethip aqqa takuneqarsinnaavoq. Fréttablaðið allappoq.

Maileq Síldarvinnslanimi pisortap Gunnþór Ingvasonip, Samherjimi pisortanut pingasunut nassiussimavaa, Samherji peqquserlulluni kanngunartuliorsimasunut ilaavoq.

- Kalaallit Nunaanni ikinngutitta qinnuigeqqammerpaanga, Tunumi Ammassalimmi aalisakkanik qajuusaasiorfimmik aalisakkanillu ikerinnaasiortunik suliaqarfissamik aalisakkeriviliorniaraanni aningaasaliinissamut, aalisarnissamut, aalisakkanik suliarinninnissamut aamma umiarsualivimmut tunngatillugu suut atorneqarsinnaanersut allattueqqullunga, mailimi 30. april 2014-imi ullulerneqarsimasumi taamatut allassimasoqarpoq.

-  Sanaartornissamik eqqarsaateqanngivippoq. Akerlianik najukkami kalaallit allanik peqateqarlutik Tunumi sanaartornissamik pilersaaruteqartuusaarlutik Naalakkersuisunit pisassinneqarnissaq iluareqqusaarnerlu anguniarsimavaat, ilanngullugu taamatut allassimavoq.

Fréttablaðið-imit saqqummiussaq naapertorlugu, peqquserluuteqarsimasup Samherjip Kalaallit Nunaanni qanoq avaleraasartoortassinneqarsinnaanerluni misilissimavaa.

Aalisakkeriviliorsinnaanermik misissuisimaneq

Henrik Lethip nassuiaatigaa, piffissap ilaani nunanit allanit aalisartut Kalaallit Nunaanni isertortukkut akunnermiliuttartut aqqutigalugit, Kalaallit Nunaanni avaleraasartoorniarnermi aallartilaatumi pisassiissutinik pissarsiniarsarinerat matumani pineqartoq.

- Ilisimasaqartuusaartorpassuit Tasiilami aalisakkeriviliorniarlutik unnerlugu politikkikkut qujageqqusaarsimapput.

- Taamaammat misissorsimavarput, aalisakkerivimmik taama ittumik ammaaniaraanni susoqarsinnaanersoq.

Henrik Lethip oqaluttuaraa, siunertarineqartoq pissutigalugu Síldarvinnslan Polar Seafoodip ukiorpassuarni suleqatigisimasaa attavigisimallugu.

- Taakku aalisakkeriviliornermik misilittagaqarput, taamaammat suliniummut taama ittumut aningaasaliissuteqassagaanni qanoq iliortoqassanersoq pillugu taakku oqaloqatigineqarsimapput.

Síldarvinnslanip pineqartoq Henrik Lethip saqqummiussaa assigalugu saqqummiussimavaa.

- Aalisakkeriviliornissamut periarfissat misissoratsigit, aningaasaqarnikkut iluaqutaanavianngitsoq inerniliunneqarpoq, Henrik Leth oqarpoq.

Polar Seafood aamma Síldarvinnslan ingerlatseqatigiiffimmik Polar Pelagicimik piginneqatigiipput, tassani Síldarvinnslan pingajorarterutaanik piginnittuulluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER