Leth toqusoorneq pillugu: Tamatta sunnerteqqaqaagut
Anders Jonas Brønsip tallimanngornermi tassanngaannartumik toqukkut qimagunnera kalaallit inuussutissarsiortut aamma sulisut 900-nit amerlanerusut akornanni tupatsitsivoq.
Polar Seafoodip siulersuini siulittaasoq Henrik Leth tallimanngornermi ualikkut pisumik alianartumik paasitinneqarpoq, tassani Polar Seafoodimik pilersitsisoq piginneqataasorlu Anders Brøns, Aalborgimi umiarsualivimmi toqungasoq siumorneqarpoq.
- Tamatta sunnerteqqaqaagut. Maannakkut ilaqutaasut sapinngisarput atorlugu tapersersorniassavagut, Henrik Leth, Sermitsiaq.AG-mut naatsukullammik taama oqarpoq.
Siulersuisunut siulittaasoq maanna oqaaseqaqqinnianngikkallarpoq.
Arfininngornermi ullaakkut suliffeqarfissuarmi aalisakkanik tunisassiorfimmi sulisut Anders Jonas Brønsip toquneranik mailikkut ilisimatinneqarput.
Anders Jonas Brønsip suleqatini Jens Salling aamma Polar Seafood Danmarkip pisortaa Helge Nielsen sisamanngornermi unnukkut neriartoqatigisimavai.
Tallimanngornermi ullaap tungaani angut toqungasoq Aalborgimi sissami inuit siumorpaat, taannalu Helge Nielsenimit kingorna Anders Brønsiusoq uppernarsarneqarpoq.
Anders Jonas Brønsip qitornai ippassaq unnukkut danskit nalunaaqutaat malillugu nalunaarfigineqarput.