Lektori: Siulersuisut suleqatigiiupput

Siulersuisut ataatsimoortuupput. Siulersuini sulineq suleqatigiiffiuvoq. Taamaammat siulersuisuni ilaasortat ataasiakkaat tunuliaqutaat pingaaruteqarpallaanngilaq. Syddansk Universitetimi lektori Søren Brinch, universitetimi HD-mik cand.merc.-imillu ilinniarfimmi siulersuisut suleriaasiannik ukiorpassuarni ilinniartitsisarsimasoq oqarpoq.

- Siulersuisut suliffeqarfiup periusissiaanik aqutsisuupput siunnerfilersuisartut aamma pisortat ingerlatsinermilu aqutsisut anguniakkanik attassinnarnissaannik isumaginnittartut. Taamaammat siulersuisuni ilaasortat qanoq ilinniagaqarnerat soraarummeersimanerminnilu allagartaat pingaaruteqarpallaanngillat. Aamma siulersuisuni ilaasortaq universitetimi ilinniagaqarsimannginnera pissutigalugu sornartorsiorneqarsinnaanngilaq.

Aqutsinermik misilittagaqarneq piumasaqaataasoq

- Suliffeqarfimmi siulersuisunut ilaasortatut inuussutissarsiornermik aningaasarsiornissamillu ilisimasaqartariaqarpoq. Aqutsisinnaasariaqarpoq aamma aqutsinermik misiliisoqarsimasariaqarpoq. Uanga isumanga malillugu siulersuisuni ilaasortanngornissamut tamanna kisimi piumasaqaataavoq. Tassa karakterit qaffasissut, soraarummeernermi allagartat kusanartut suliaqarfimmillu ilisimasaqarneq tassani tunulliunneqartarpoq. Biilertoqarsinnaavoq tændrørimik qanoq taarsiisoqartarnersoq ilisimanngikkaluarlugu, Søren Brinch nassuiaavoq.

- Siulersuisuni suliaqarnermi ataasiakkaat sunik nassarlutik takkunnersut apeqqutaavallaanngilaq, ataatsimoortuunissaq tassani pisariaqarami. Taamaammt siulersuisut siammasissumik inuttalersorneqassapput, aamma tupaallatsitsisinnaasut allatut eqqarsarlutik ajornartorsiutinik aaqqiisinnaasut inissaqartinneqarput.

- Suliffeqarfinni siulersuisut piffissaq ungasinnerusoq eqqarsaatigalugu sulisussaapput. Siulersuisut tassaapput suliffeqarfiup ukiut marluk, tallimat qulillu qaangiuppata sumi inissisimanissaanik aalajangiisussat. Tamanna taamaallaat pisinnaavoq tamakkiisumik takunnissinnaallunilu anguniagaqaraanni. Pingaaruteqarporli siulersuisut pisortanit ulluinnarnilu aqutsisunit sunik naatsorsuuteqarnerminnik nassuiaasiorsinnaanerat.

- Taamaamma suliffeqarfimmi pisortat suliffeqarfiup siulersuisuini susassaqanngillat, tassa suliffeqarfiit pisortanit pigineqartut eqqaassanngikkaanni. Matumanimi pineqarpoq akuleruttussaannginnermik tunngaveqarneq aamma pisortat siulersuisullu akornanni suliassat erseqqissumik agguataarneqartarnissaat

Anguniakkat erseqqissut malitseqartitsisarnerlu

Akerlianik siulersuisut oqaloqatiginnissinnaassuseqassapput, Søren Brinch isumaqarpoq.

- Siulersuisut erseqqissunik anguniagaqartussaapput. Pisortanit qanoq naatsorsuuteqarnerlutik nassuiarsinnaassavaat – pisortallu tamatumanna naammassinninngippata pisortat anguniakkalluunniit allanngortinneqartariaqarlutik.

Siulersuisunik katiterinermi pingaaruteqarpoq, sulisut sinniisaasa suliassaanik eqqumaffiginninnissaq, taakkumi siulersuisuni ilaasortaapput.

- Siulersuisuni arlalinni sulisut HR-mut tunngatillugu annertuumik sammisaqartarput, suliffeqarfimmulli tunngatillugu tunniussaqarnerujussuusinnaagaluarput, periusissiaq naapertorlugu sulisartuugunik aamma sulisutkisiisa pinnagit suliffeqarfiulli sumut ingerlanneqarnissaanik aiunnersuuteqartartuugunik, Søren Brinch oqarpoq.

Siulersuisut inuussutissarsiornermi suliaqartarnerat ukiuni kingullerb sammineqalersimavoq – tamannalu Søren Brinchip nuannaarutigaa.

- Siulersuisuni suliaqarnissamut pikkorissartarneq soqutigineqaleriartorpoq. Tamanna malugilluarparput – tassa ilinniagaqartut akornanni aamma ilinniartitseqqilluta pikkorissaasarnitsinni. Siulersuisuni suliaqarneq ingerlatseriaatsimi soqutigineqalersimavoq – siulersuisunilu suliaqarnissaq tunulliunneqartarunnaarluni, inuussutissarsiutigalugu suliffiulersimalluni