Lektori: Kinap peqataatinneqannginnissaa isumaqatigiissutip naqissuserpaa
Nuummi Ilulissanilu mittarfiliornissamut atatillugu itigartitsisinnaatitaasoqarsinnaanissaa isumaqatiginninniutigineqassaaq
Naalagaaffiup Ilulissani Nuummilu mittarfissanut piginneqataanissaa assigiinngitsutigut sunniuteqassaaq.
Kalaallit Nunaata Danmarkillu ataqatigiinnerannut ilisimasalik Jon Rahbek-Clemmesen Forsvarsakademimeersoq naliliivoq.
Isumaqatigiissutaasut ilagaat:
"Piginneqataasutut pisinnaatitaaffiit ilanngullugit piginnittuunermut isumaqatigiissut atuuttunngortinneqarpoq, taanna pingaarnertut makkuninnga aalajangersakkanik imaqarpoq: Niuernermi piumasaqaatit ilannguttussaannginnerlu pillugu tunngavigisaq naapertorlugit (i) piginnittuunermut tunngaviit, (ii) itigartitsisinnaatitaaneq, (iii) aqutsisut katitigaanerat, (iv) iluanaarutissatut naatsorsuutigisinnaasat, (v) piginneqataassutsit aqutsisullu katitigaanerisa
allanngornerat, (vi) paasissutissat ingerlaarnerat, (vii) saqitsaannernik aaqqiissuteqarneq, (viii) susassaqaqatit allallu akornanni pissutsit."
Piginneqataassut Naalakkersuisunut siulittaasumit aamma danskit aningaasaqarnermut ministeriannit isumaqatiginninniutigineqassaaq. Oqaaseq 'itigartitsisinnaatitaaneq' isumaqatigiissummi peqataaneq Jon Rahbek-Clemmesenip maluginiarpaa.
- Piginneqataassutsimut tunngasoq suli isumaqatiginninniutaanngilaq, oqaaseqaatinili qanoq allaqqasoqarnissaa suli ilisimanngilarput. Mittarfiliornissanut atatillugu kikkut aningaasaleeqataanissaannut apeqqummi itigartitsisinnaasoqassappat tupiginavianngilara, oqarpoq.
Kiniiserit peqataannginnissaannut isumaqatigiissusiornerunersoq Lars Løkke Rasmussenip tusagassiortunut katersortitsinermi ilumuunnginnerarpaa. Kisianni tassa taannaqqissaaq pillugu isumaqatigiissuteqartoqartoq Jon Rahbek-Clemmensenip nalilerpaa.
- Kiniiserit aningaasaliinnginnissaat piniarlugu Naalagaaffik 700 million koruuninik aningaasaliissuteqarpoq oqarpoq.
China Communications Construction Company (CCCC)-ip Kalaallit Nunaanni mittarfiliornissanut atatillugu eqqarsaateqarnera Folketingimi aalassassutaavoq ukioq manna.
Tamanna Folketingimi oqallisigineqareermat Kim Kielsen aamma Lars Løkke Rasmussen ataatsimeeqatigiipput, tassani periarfissat eqqartorneqarlutik.